19 болум
Байэл Арстын аркасынан акмалап айдап жөнөдү. Чоң жолго чыга бергенде унаасын катуу ылдамдыкта айдап Арсты ашып өтүп жолун тороду. Арс алдына чыга калган унааны көрө коюп тормозду басканга араң жетишти. Унаа сүрүлүп барып алдындагы унаага жанашып токтоду. Жинденген Арс атырылып эшикке чыгып алдындагы унаага жетип барды.
– Эй, акмак, сен эмне жаныңдан кечтиң беле?- алгач унааны тааныган жок.
– Ой-ой, коркуп кеттим. Жинге тийген кандай экен?- кыйкырынып, сөгүнүп жетип келген Арска унаадан чыгып келе жатып сүйлөдү.
– Иттин гана баласы, сен белең? Эмне, мени акмалагыдай болуп калдың беле? Көмөлөтө сүзүп кетпептирмин да. Сөөгүң талаада ит-кушка жем болмок. Сени ким сурап келмек эле?- Байэл Арсты көз талаштыра муштап жиберди.
– Сүйлөйт десе сүйлөй бербечи. Көрөбүз кимдин ит-кушка жем болорун,- көзү караңгылай түшкөн Арсты Байэл жакадан ала муунтту.
– Коё бер, өзүңдү ким ойлоп алгансың?- Арс жулкунуп бошонду.
– Куйругуңду түйүп качып кетпей, мени менен чогуу айда.
– Мен сени мененби?- кытмырлана күлдү Арс.
– Жолдун ортосунда турганыңа сүйүн, болбосо… Эркексиңби, эркекче чечишели.
Унаалар кубалаша айдап ээн талаага жетип келишти. Арс унаадан түшөрү менен Байэлге тапанча сунду,- Байэлди коркутуп качырам деп ойлогон.
– Ит аткандай атып салам!
– Ме, ат, духуң жетеби?- Байэл Арска жакын келди.
– Сен Аделяга татыктуу эмессиң.
– Сен татыктуусуңбу? Сендей катынды Аделя жанына жолотпойт. Юбкаң кана? Мушташкандан коркуп жатасыңбы? Мушташ, жеңилсем Аделяга татыктуу эмес экенимди кабылдайм,- Байэл Арстын тапанчасынан коркуп да койгон жок. Арсты билекке чапканда бош турган тапанча ыргып кетти. Байэл шамдагайлык менен жерден алды да, туш келди ыргытып салды.
– Өзүңө катуу ишенип алгансың го,- Арс сырткы күрмөсүн чечип жерге таштады.
Айдын жарыгында бирин-бири ашата сөгүп, сүйүүсүн жеңип алгысы келген эки жигит балжа-булжа түшүп мушташып жатышты. Каны кайнап турган немелер бири-бирине оңой атаандаш эмес эле. Моюн талаштыра соккон соккудан Арс кулап түштү.
– Аделяга жакындап көр. Керек болсо атын оозуңа алба!- Байэл жерде жаткан Арсты болушунча туш келди тепкилей берди. Шайы кете түшкөн Байэл унаасын көздөй барды да, от алдырып жөнөп кетти.
ххх
Маржан уулу Барсбектин бөлмөсүнө кийимдерин алып кирди. Барсбек керебеттин үстүндө ноутбукту карап көмкөрөсүнөн жаткан бойдон уктап калыптыр. Үстүн жаап, ноутбукту алып коёюн дегенде экран жарык боло түштү эле, Аделянын сүрөтү көрүндү. Маржан чочуп кетти. Бөлмөдөн тышка атып чыкты. “Уулум, сен ашык болдум дей көрбө. Башка кыз калбай калгансып, Байэлге окшоп Баатырдын кызын сүйүп кала көрбө” деп күбүрөнүп жаткан Маржанды Болоттун үнү чочутуп жиберди.
– Кимге сүйлөп жатасың?
– Ой, уулуң дагы адатынча төшөктүн сыртында уктап калыптыр,- уурусун карматкандай аял ыңгайсыздана түштү. Болот башка эч нерсе деген жок. Санаасы тынып калды.
Түн бир оокумда Байэлге кат жазуу оюна келди. Болгон окуяны жазам деп ойлогон, жаза албады. Бир аз жазып, анысын кайра тытып таштандыга сала берди. Акыры жөн гана Аделя анын тууганы экенин жазды. Кагазды колунда кармаган бойдон терезеден сыртты карап термеле ойлонуп турду. Акыры бир жолун таап Байэлге катты бермей болду.
ххх
Арс чыйрыгып үшүп чыкты, астына да сыз өтүп жаткандай. Турайын дейт, дарманы келбейт. Жаткан жерин сыйпаласа колуна чөптөр урунду. Өзүнө келе түштү. Көзүн ачса таң үрүл-бүрүл сүрүп калыптыр. Талаада жатканын түшүндү. Оодарылса денеси жанчылып калыптыр. Бүткөн бою ооруксунуп турду. Башын көтөрүп эки жакты карады. Арыраакта турган машинасы, алыстан шаардын жарыктары көзүнө урунду.
– Мага эмне болду? Кандайча бул жактамын?- катуу удар жеп калган неменин эсине эч нерсе келчүдөй эмес, башы каңгып оорутуп жатты. Туруп тамтаңдай басып унаасына жетип от алдырып, үшүп калганга жылыткычын иштетти. Бир аз жылынган соң күзгүгө моюн сунду. Машинанын ичиндеги жарыктан бетинин кан экени даана көрүндү. Колу менен кармалап көрдү, эбак эле катып калыптыр.
– Үйдөгүлөр козголгончо үйгө жетейин,- Арс унаасын айдап шаарды көздөй жөнөдү. Үйүнө жетип, унааны сыртка токтотту да, акырын кирип дароо душка кирди. Мурду эле канаган көрүнөт, Кудай жалгап бети таза экен. Сол көзүнүн алды көгөрүп калыптыр. Байэл менен жолукканын эстеди. Кийимдерин чогултуп таштандыга салды.
– Бул үчүн жооп бересиң. Жеңилдим деп сени тынч жашатып койбойм,- муштумун түйө жинденип Арс бөлмөсүнө кирип кетти.
ххх
Арс деп жүрүп убакыттан уттурган Байэл таң эрте туруп ишине киришти. Аялдын кайсы жактарда жүрөрүн, уулунун бала бакчасынын дарегин, баарын билди. Социалдык тармактардагы аялдын баракчасы Байэлге даяр карта болуп берди. План боюнча аракетин баштады, аял менен мамиле түзүүнү көздөгөн Байэл аны артынан калбай акмалоого өттү. Аял унаасын токтотуп, сулуулук салонуна кирип кеткенде Байэл барып унаанын дөңгөлөгүнүн желин чыгарып салды да, унаасында аялдын чыгышын күтүп отурду. Бир сааттан өтүп аял салондон чыкты. Машинасынын эшиктерин алыстан ачып чекчеңдей басып келип машинесин ачты. От алдырып жатып дөңгөлөктүн жели чыгып калганын сезди. Чыгып карап эле жиндене телефонун алып бирөөгө чалганы жатканда Байэл капыстан ушул жерге токтой турган киши болуп келип калды.
– Кечиресиз, сиз чыгып жатасызбы? Мен сиздин ордуңузга коёюн.
– Муну көргөн жоксуңбу?- аял дөңгөлөктү бир тепти.
– Ой, кечиресиз, аны көргөн жокмун да. Бар беле, алмаштырып берейин?
– Шашып жаттым эле. Унаам ушул жерде кала берсин. Мени жеткирип койчу,- аял так кесе сүйлөдү.
– Макул, кел, отуруңуз. Унаам сиздей сулуу айымдар отурганга ылайыкталган эмес, көңүл бурбаңыз.
– Мага айырмасы жок. Ансыз деле такси чакырып жаткам. Убактым аз.
Аял дарегине жетип калганда акча берди.
– Албайм, эже, уят эмеспи, мен таксист эмесмин да. Андан көрө номериңизди…
Аял Байэлдин сөзүн аягына чейин укпастан капчыктан алып чыгып визиткасын сунду да, тыкылдай басып кетти.
Байэл интернеттен дөңгөлөк жасагандардын номерин карап жанагы дарекке чакырды.
– Чыгаша болбосо, киреше кирбейт. Муну колго алсам, анан калганы турган иш,- жигит кайра аялдын унаасы калган жерге келди. Дөңгөлөктү жасатып бүткөн соң аялдын визиткасын алып чыкты.
– Мм, Исаева Аида Жапаровна,- телефонуна номерди терип чала баштады.
– Алло, Аида Жапаровна, мен сизди жеткирип кеттим го. Унааңыздын дөңгөлөгүн жасатып койдум. Каалаган учуруңузда айдап кетсеңиз болот. Ачкычыңыз болгондо жеткиртип коймок экенмин.
Аиданын эсине ачкыч түштү. Сумкасын карап таппай калды.
– Мен шашып жатып ачкычты ичинде калтырып кеткет турбаймбы. Сенин болгонуң жакшы болбодубу.
– Андай болсо, эже, сарсанаа болбоңуз,- Байэл өзүнүн унаасын таштап, аялдын унаасын айдап жөнөдү. Жипти чаң ызгыта айдап бир моокумун кандырып алды. Байэл дарекке жете бергенде аялга телефон чалды.
– Эже, мен келдим. Ачкычты алып каласызбы?
– Азыр, 5 мүнөт.
Байэл унаага суктана көз жүгүртүп жатканда аял чыгып калды. Жигит аны утурлай басты.
– Рахмат сага. Убара болдуң. Кантип ыраазычылык билдиришти билбей турам. Атың ким?
– Байэл.
– Жакшы атың бар экен. Мени Аида эже десең болот. Азыр буга чай ичип кой,- аял жигитке 100 доллар сунду.
– Жөн эле коюңуз, болгону жигиттик парзымды аткардым.
– Албасаң мен капа болом.
– Албайт элем. Бирок сиздей сулууларды капа кылган күнөө болот го…
Аял менен коштошкон Байэл 100 долларды чөнтөккө салды. Баары пландаганынан дагы жакшы болду. Кымыңдаган бойдон такси менен унаасына жетти. Байэлди узатып ичкери кирген аял көпкө ал тууралуу ойлонду. “Мындайлар бой көтөргөн керсейген немелер болчу эле. Жакшы жигит экен” деп Байэлге аябай ыраазы болуп отурду.
ххх
Терезеде адатынча Аделя жылдыздарга суктанып отурду. Жылдыздарды караганда эс ала түшөт. Жанында Байэл болсо андан да жакшы болмок. Анын далысына башын жөлөп, ага эркелеп жылдыз учкан сайын бирге тилектерин айткан учурда Аделядан бактылуу киши жок. Антип отурмак кайда, телефону өчүк, кечээтен бери Байэлден дайын жок. Акыркы учурда Байэл кызды көбүрөөк капа кылчу болду. Сүйүүнүн көзү сокур дейт эмеспи, канча жини келбесин күдөрүн үзбөй Байэлге дагы бир чалып көрдү, өчүк. Аңгыча видеочалуу менен Барсбек чалып калды. Ата-энесин ээрчип үйүнө конокко келгенде эле Барсбекке Аделя жагып калган. Кызды чочутуп албайын деп сезимдеринен шек билдирбейт. Жөн гана ар нерсени айтып, кызга кызыктуу маектеш болуп берет. Барсбек орто бойлуу, кең далылуу, жүлжүк көздүү ак жуумал жигит. Өзү да адамга жугумдуу, жылдыздуу. Аделя экөө башында эле жакшы тил табышып кетишкен. Экөө ошондон бери телефон аркылуу көп сүйлөшүшөт. Көптөн берки тааныштардай эле бири-бирин тамашалап, аркы-беркини айтып, айтор, экөөнүн сүйлөшө турган темасы түгөнбөйт.
– Кандай? Бош элесиңби?
– Көрүп жатасың да эмне кылып жатканымды,- Аделя терезеде отурганын, сырттагы караңгы түндү көрсөттү.
– Дал убактысында чалыптырмын да. Күндө айта берип жылдыздар сенин тилегиңдин баарын жаттап бүттү го, ыя?- Барсбек кызды тамашалай күлүп калды.
– Тилекти айтасың да. Мен өзү унутулуп кала турган адам эмесмин го,- кыз кылыктана саамайындагы чачтарын өйдө көтөрдү.
– Аның чын, мен да сени унута албай жүрбөймүнбү…- жигит оюндагысынын бир үзүмүн тамаша-чынга аралаш ортого салды.
– Ыя? Ошондойбу? Кыйын болуптур сага,- кыткылыктап күлгөн кыз тамаша катары эле кабыл алды. Жигиттин түпкүрдөгү изги сезимдерин байкаган жок.
– Барсбек, мага бирөө чалып жатат,- Аделя Байэлдин чалуусун алды.
– Мындай убакытта менин чалуумду күттүрүп ким менен сүйлөшүп жатасың?- одураңдап өктөм сүйлөдү. Учурашпай кепти ушинтип баштады Байэл. Акыркы убактарда кызга салкын мамиле кылып жатканын акчанын, күмөндүү иштердин артынан жүрүп жигит өзү деле байкабай калды.
– Мен го мен, сиз эмнеге керели кечке өчүксүз?- жини келип турган кыз да бир тийди.
– Жыргап жүргөн жокмун. Жумуштан бошобой жаттым.
– Бир да жолу телефон кармаганга убакыт артпаган кандай жумуш ал?- кыз ызалана мукактанып үн катты. Эгер Байэл учурашып, сагынганын айтып жакшынакай сөз баштаса кыз эч нерсе демек эмес. “И-и, жумушунан чарчаптыр” деп аны аямак. Дароо кызганып кыйкырып баштаганы үчүн кыздын жигитке ачуусу келип кетти.
– Телефонум өчүп калган. Үйгө келерим менен сага чалдым,- калпын карматып койчудай болуп жигит актанып жиберди. Кыз билгенден башка телефон номери бар экенин, керели кечке башка номер салып жүргөнүн кызга айтмак беле? «Жүк түшүрдүм, жабык беттешке чыктым» деп эле койгону болбосо, эмне иш кылып жүргөнүн кыздан жашырат. Бирөөлөрдү тоноп иштеп жатам деп айта алат беле?
– Кечирип койчу, мен сени кызганып кетпедимби,- Байэл кызды жумшартууга аракет кыла баштады.
– Кимден, караңгы түндөнбү? Үйдө жалгызмын, апам менен сүйлөшүп жаткам,- кыз калп айтты атайылап эле. Ачык айттым дегиче дагы бир чырдашуу башталат. Ушинтип кутулайын деди. Ансыз да Арстан кызгана берип жүдөтүп жиберди кызды.
– Эми төрт тарабың төп келишип турса. Сени кантип кызганбай коём? Мүмкүн болсо, сени эч кимге көрсөтпөй сандыкка салып жаныма алып жүрөт элем.
– Анчалыкка кетпеңиз. Ансыз да үйдөгүлөрдүн сандыгынан кутула албай жатам. Дагы атам жок ээн-эркин жүрөм. Эми атам келсе кайра башталат.
– Мейли, жакшы жат. Мен өчүрдүм,- деди Байэл шашыла. Эшиктин коңгуроосу басылганда Тахирдин келгенин билди. Экөө эми сүйлөшүп баштаганда күтүлбөгөн жерден Байэлдин телефонду өчүрүп салганына кыз ого бетер жинденип калды.
– Анда чалбай эле койбойт беле. Эмне чалды?- өзүнчө жиндене сүйлөнүп отуруп эмнегедир Барсбекке чалгысы келди. Ага мурда-кийин өзү жазып же чалып көргөн эмес. Дайыма Барсбек чалар эле. Номерди терип, кайра өчүрүп жатып, акыры Барсбекке чалуу кетти. Бул учурда Барсбек телефонду ишене албай карап турду. Капыстан чалып алды деп ойлоду. Бирок чалуу узакка созулду. Жигит кубанган бойдон телефонду алды. Барсбек эмнегедир адаттагыдай дароо сүйлөп жиберген жок. Ортодо тынчтык бир нече мүнөткө созулду. Кыз чаларын чалып алып унчукпай тура берди. Анын үстүнө Байэлге таарынып калган неме дароо ачылып сөз баштай албай койду. Кыздын өзү чалганы жигитке сезимдерин билдиргендей эле туюлду. Толкунданып кетти.
– Эмне унчукпайсың? Мен сүйлөбөсөм сен такыр сүйлөбөйт турбайсыңбы…- кыздын ыңгайсыздана түшкөнүн сезген жигит.
– Сүйлөбөй тура берсем эмне кылар экен дебедимби,- ушинтип экөөнүн сөзү уланып кетти. Кыздын көңүлү жайлана түштү. Экөө түн бир оокумга чейин сүйлөшүштү.
ххх
Байэлдин түзгөн планы иштеп жатканына Тахир баа берди. Аялдын баласын уурдоого башка балдарды дайындап бермей болду Тахир. Байэл бүгүн дагы аялды акмалаганга даярданып жатты. Аял социалдык баракчага эч кандай видео, сүрөт киргизбей жатканына Байэл кабатырланып жатты. Ушул ишти ийгиликтүү бүтүрүп алсам деп ак эткенден так этип санааркап турган чагы. Сыпайы көрүнгөн жигиттин мындай жаман оюнан кабары жок аял бул маалда Байэлди ойлоп жатты. Узун бойлуу, кең далылуу, келбеттүү, сылык-сыпайы жигит көргөндөн бери эмнегедир акылынан чыкпай койду.
– Менден көп болсо 3-4 жаш кичүүдүр. Айдоочу кылып алсам, анан калганын көрө жатармын…- Аида Байэлди кылтакка илүүнү көздөй баштады.
Күтпөгөн жерден Байэлге Аидадан чалуу келди. Байэл кытмыр жылмая телефонду алды.
– Алло, саламатсызбы?- Байэл олуттуу үн менен.
– Кандайсың? Сени менен сүйлөшөйүн дедим эле. Убактың болсо бүгүн мага жолугуп кетпейсиңби?
– Сиз үчүн убакыт табабыз. Дарегиңизди жөнөтүп коюңуз,- дароо макул болбой анан, көктөн издегени жерден табылып жатпайбы.
Түш оой Байэл аял жөнөткөн дарекке келди. Бул дарек аялдын батири жайгашкан жер экенин Байэл дароо билди. Билмексен боло аялдан тактап сурап, 7-кабатка көтөрүлдү.
– Кел, мынча бат келет деп күткөн эмес элем,- жаркылдап күлүп Аида тосуп алды. Байэлди конок үйүн көздөй алып жөнөдү. Чакан дасторкон даярдап коюптур.
– Күттүргөндү жакшы көрбөйм. Анын үстүнө бүгүн бош элем,- дасторконго отуруп жаткан Байэлдин көзүнө коньяк урунду.
– Жакшы экен, мен да күткөндү жаман көрөм. Кел, тамакка кара.
Аиданын шашпай отурайын деген ою бар эле. Жигит бекерчи адам катары көрүнгүсү келген жок.
– Эмне иш менен чакырдыңыз эле?- дароо суроо узатты.
– Мен айдоочу издеп жаткам. Айдоочум, жардамчым боло турган ишенимдүү жигит керек мага. Сен мага жактың. Айлыгыңды жакшы төлөп берем. А өзүң эмне иш кыласың?
– Дүкөндөргө товар жеткирем.
– Эмне кыласың чаң болуп товар ташып? Сендей жигитке андай майда-барат жумуш жарашпайт. Эгер иштегенге каалооң болсо кел. Оор деле жумуш кылбайсың, менин жанымда эле жүрөсүң.
– Ойлонуп көрөйүн. Иштөө графигим кандай болот?- дароо макул дегиси келген жок. Бир аз бааланып койгусу келди.
– Эми, Байэл, мен сени аркандап албайм, коркпо. Каалаган убагыңда кетсең болот. Адамдын эркиндигин чектеген жакпайт мага.
– Болуптур, Аида эже, эртең менен жообун берем. Сиздин ишеничиңизди жерде калтырбаганга аракет кылам.
– Күткөндү жаман көрөм, эстетип коёюн. Жакшы бар,- Аида Байэлдин колун кармап бетинен акырын өөп койду.
(Уландысы бар)
