Turmush — Ош облусунун Кара-Кулжа районунда жалпы 45 турак үйгө сел суулары кирди. Бул тууралуу райондук администрациядан билдиришти.

Маалыматка караганда, 20-апрелден баштап катуу жааган жаандан улам айрым аймактарда сел жүрдү. Учурда ӨКМдин жана айыл өкмөттөрдүн, жол тейлөө ишканаларынын техникалары иш алып барууда.

Жалпы 45 турак үйгө, 54 короо-сарайга сел суулары кирген. Бүгүн, 22-апрелде ӨКМ жана жарандык коргонуу кызматы тарабынан тазалоо иштери улантылууда. 3 турак жай жараксыз абалга кептелди. Ошондой эле 2 бала бакча, 1 мектеп, 1 үй-бүлөлүк дарыгерлер тобунун имараты да жараксыз абалга келди. 4 техника жабыркап, 7 кой сарайда өлдү.

20-апрелде сел агымы 4 адам бара жаткан унааны агызып кеткен. 3 адам куткарылып, 1 адам каза болду.

Учурда бардык жол каттамдары ачык.

————————————————

2024-жылдын 20-апрелинде Ош облусунун Кара-Кулжа, Алай, Ноокат, Кара-Суу райондорунда сел жүрдү.

Ош—Гүлчө—Сары-Таш—Иркештам унаа жолунун 45-49-чакырымдарында 2 тилкеге сел түшүп, жол каттамы убактылуу жабылган.

Ошондой эле Алай районунун Тилектеш айыл аймагынын Тогуз-Булак айылында сел жүрүп, Гүлчө—Жошолу ички чарбалык унаа жолунун 7 чакырымы жабылган.

Мындан тышкары Ош облусунун Кара-Суу районунда 20-21-апрель күндөрү нөшөрлүү жаандан кийин сел жүрүп, унаа жолдорду, ички чарбалык жолдорду каптап, үйлөргө, социалдык объекттерге суу кирди.

2024-жылдын 21-апрелинде жарандык коргоонун чечими менен Ош облусуна өзгөчө кырдаалдар режими киргизилди.