Turmush — Ош облусунун Кара-Кулжа районунда адашып кеткен эки өспүрүм бала табылды. Бул тууралуу Ош ОИИБдин басма сөз кызматы билдирди.

Маалыматка караганда, 2024-жылдын 20-апрелинде саат 22:50 чамасында Кара-Кулжа райондук ички иштер бөлүмүнө Ылай-Талаа айыл аймагынан эки өспүрүм Кызыл-Таш жайлоосуна бара жатып, катуу жааган жаандан улам адашып кеткендиги тууралуу маалымат келип түшкөн. Бул факты каттоого алынып, милиция кызматкерлери аталган жайлоого жөнөп кетишкен.

Кызматкерлер жайлоого түнкү саат 00:00 чамасында жетип, эки жаш өспүрүмдү издеп табышкан. Өспүрүмдөр ата-энеси менен жайлоого кой айдап көчүп бара жатышып, ата-энеси узап кеткендигин, алар жүк артылган эшектерди минип баратып артта калып, күн кеч болуп, жаан катуу жаап киргендиктен жолдон адашып кетишкендигин билдирген.

Алар Ылай-Талаа айыл аймагынын тургундары — 2015-жылы туулган А.А. жана 2017-жылы туулган Р.Б. экендиги аныкталган.

«Өспүрүмдөр сел аккан сайга туш болуу коркунучу жогору болгон. Аларга тамак-аш берилип, кийимдери кургатылып, сак-саламатта туугандарына өткөрүлүп берилди», — деп айтылат маалыматта.

Turmush 2024-жылдын 20-21-апрелинде Ош облусунун аймактарында, анын ичинде Кара-Кулжа районунда сел жүргөнүн жазган.

Мырзаке—Кара-Кулжа—Алайкуу унаа жолунун 41-чакырымында жеңил унааны сел суусу агызып кеткен. Унаанын ичинде 1 эркек, 2 аял жана 1 жаш бала болгон. Эки аял менен жаш баланы жергиликтүү тургундар куткарып калышкан. Ал эми унаанын айдоочусун сел агызып кеткен.