Turmush — Кочкор районунун Кочкор айылында Улуу Жеңиштин 79 жылдык мааракесине карата салтанаттуу иш-чара өтөт. Бул тууралуу акимчиликтен билдиришти.

Маалыматка караганда, анда «Өлбөс полк» акциясынын алкагында жүрүш өтөт. Жүрүш 9-Май күнү саат 10:00дө бир жагы сейил паркынан башталса, экинчи жагы Кочкор райондук ооруканасынан башталат. Мында райондун тургундары согушка катышкан, тылда эмгектенген чоң ата- чоң энелердин сүрөттөрүн көтөрүп, жүрүшкө катышат.

«Өлбөс полк» жүрүшү Кочкор районунда 2018-жылга чейин уюштурулуп келген. Кийин пандемияга байланыштуу токтотулуп, ошондон бери боло элек. Кочкор районунан 1941-1945-жылдары Улуу Ата Мекендик согушка 5510 эр-азамат катышкан. Алардын 1125 дайын-дарексиз болсо, 255 жоокерге кара кагаз келген. Ал эми согуштан аман келгендердин дээрлик көпчүлүгү майып болуп келишкен. Кочкор районунда азыркы учурда согуштун ардагерлери калган эмес.