Turmush — Ысык-Көл облусунда 15 жылдан ашык издөөдө жүргөн адам кармалды. Бул тууралуу Ысык-Көл ОИИБдин басма сөз кызматы билдирди.

Маалыматка караганда, 24-25-апрель күндөрү өткөн «Издөө» операциясынын жүрүшүндө Жети-Өгүз районунун ички иштер бөлүмүнүн кызматкерлери тарабынан 2007-жылдан бери издөөдө жүргөн Түп районунун 46 жаштагы тургуну С.М. кармалды.

2006-жылдын ноябрь айында кармалган С.М. өзүнүн шериктери А.Т. жана У.К. менен алдын ала сүйлөшүп алышып, Жети-Өгүз районунун Ак-Терек айылынын тургундарына тиешелүү эки баш жылкыны уурдап кетишкен. Анын кесепетинен мал ээлерине жалпысынан 40 миң сомдук материалдык чыгым келтирилген.

Аталган факты боюнча кылмыш иши козголуп, ыкчам иликтөө иш-чараларынын жүрүшүндө А.Т. жана У.К. кармалган болчу. Ал эми С.М. изин жашырып, качып кеткендиктен издөөдө жүргөндөрдүн тизмесине киргизилген.