Turmush — 20-апрелден 24-апрелге чейин нөшөрлөгөн жаандан улам Жалал-Абад облусунун аймагында 22 сел кырсыгы катталды. Бул тууралуу Turmush басылмасына Өзгөчө кылдаалдар министрлигинин Жалал-Абад облустук башкармалыгынан билдиришти.

Маалыматка караганда, табийгат кырсыгында 705 турак үйдү, 5 социалдык объектини суу каптады.

«20-апрелден берки 4 күн ичинде облустун Сузак, Базар-Коргон, Ноокен, Аксы, Ала-Бука, Токтогул райондорунда, Таш-Көмүр, Майлуу-Суу, Жалал-Абад шаарларында нөшөрлөп жааган жаандан улам сел кырсыктары орун алган. Анын кесепетинен 705 турак жайдын короолорун сел суулар каптагандыгы аныкталды, анын ичинен 17 турак үйдүн ичине суу кирген. 2 үй жашоого жараксыз, авариялык абалга кептелген. Мындан сырткары сел суулары 5 социалдык объектини каптап, 3 жеке менчик унаага зыянын тийгизген. Аны менен катар 43 чарбалык курулуш, 14 чакырымдан ашуун ички чарбалык жолдор бузулган. Кыян суу 10 чарбалык көпүрөнү, 5 ийри мүйүздүү, 77 майда жандыкты, 626 үй канатуусун агызып кетти. Мындан сырткары 88 гектар айдоо жери, 4750 метр сел өтүүчү каналдар селдин кесепетинен жабыркады.

Жабыр тарткан аймактарда санитардык-эпидемиологиялык көзөмөлдөө борбору тарабынан 434 турак жай заласыздандырылды. Аталган аймактарга ӨКМден 32 бирдик автоунаа, 342 куткаруучу, 34 мотопомпа тартылды», — деп айтылат маалыматта.

Селден келтирилген материалдык чыгымдарды атайын түзүлгөн жумушчу топ эсептеп жатат.

Сузак районуна үчүнчү даражадагы өзгөчө кырдаал режими киргизилди.

Маалыматка караганда, 20-апрелден 24-апрелге чейин жааган жамгырдан улам Сузак районунун Барпы, Кызыл-Туу,Сузак айыл өкмөттөрүндө турак жайлардын королорун сел суулар каптаган. Көк-Арт дарыясында суунун дээңгели көтөрүлүп, бир топ аймактарга кооптуулук жаратканды үчүн Сузак районуна райондук Жарандык коргоо башчысынын буйругунун негизинде 3-даражадагы өзгөчө кырдаал режими киргизилди.

Ошондой эле Ноокен районунун Момбеков айыл аймагында өзгөчө кырдаал режими жарыяланды.