Turmush — Жалал-Абад шаарында социалдык тармактагы баракча аркылуу экстремисттик көз карашты жайылткан 30 жаштагы тургун кармалды. Бул тууралуу Жалал-Абад ОИИБдин басма сөз кызматы билдирди.

Маалыматка караганда, милицияга шаар тургуну Кыргыз Республикасында тыюу салынган диний-экстремисттик, террористтик уюмдардын биринин материалдарын ачык түрдө сактап, Фейсбук социалдык баракчалары аркылуу чакырыктарды жасап, бөлүшүп жатканы тууралуу кабар түшкөн. Жалал-Абад шаардык ички иштер бөлүмүнүн экстремизмге жана мыйзамсыз миграцияга каршы аракеттенүү тобунун кызматкерлери тарабынан жүргүзүлгөн ыкчам иликөө иш-чараларынын жыйынтыгында диний-экстремисттик, террористтик багытта аныкталган социалдык баракчаны колдонгон шаар тургуну аныкталды.

«Бул факты боюнча чогулган материал 18-августта Жалал-Абад ШИИБдин Кылмыштардын бирдиктүү реестрине катталып, Кылмыш-жаза кодексинин 332-беренесинин (экстремисттик материалдарды даярдоо, таратуу) негизинде кылмыш иши козголгон.

Тергөөнүн жүрүшүндө диний-лингвистикалык жана техникалык экспертизалар дайындалып, натыйжада Кыргыз Республикасында тыюу салынган диний-экстремисттик, террористтик «Өзбекстан ислам кыймылы» уюмуна тиешелүү материалдарын бөлүшүп жүргөнү такталды», — деп айтылат маалыматта.

Аталган жаран Жалал-Абад шарынын 1992-жылы туулган тургуну Х.Ф. экендиги аныкталып, тергөө кызматына өткөрүлүп берилген.

Кечээ, 24-августта Жалал-Абад ШИИБдин убактылуу кармоочу жайына киргизилди. Учурда бул кылмыш ишти соттун кароосуна өткөрүү максатында тергөө аракеттери жүрүп жатат.