Turmush — Ош облусунун айрым райондорунда сел жүрдү. Бул тууралуу ӨКМдин басма сөз кызматы билдирди.

Маалым болгондой, 2024-жылдын 20-апрелинде болжол менен саат 17:30 чамасында катуу жааган жамгырдын кесепетинен Ош—Гүлчө—Сары-Таш—Иркештам унаа жолунун 45-49-чакырымдарында 2 тилкеге сел түшүп, жол каттамы убактылуу жабылган.

Жолду сел калдыктарынан тазалоо үчүн №959 жол тейлөө мекемесинен 2 автогрейдери тартылды.

Жеринде Кара-Суу району боюнча ӨКБнын башчысы майор С.Осмонов иш алып барууда.

Ошондой эле, Алай районунун Тилектеш айыл аймагынын Тогуз-Булак айылында сел жүрүп, Гүлчө—Жошолу ички чарбалык унаа жолунун 7 чакырымы жабылган.

Жерине Тилектеш айыл аймагынан грейдер тартылып, унаа жол саат 19:30да тазаланып ачылган.

Мындан тышкары Кара-Суу районунда жаап өткөн жаандын кесепетинен Кызыл-Суу айыл аймагынын Чаеке айылында сел жүргөн.

Жерине маалымат тактоо максатында Кара-Суу райондук ӨКБдан ыкчам топ жана Кара-Суу РМА башчысы чыгып кеткен.

Буга чейин Алайдын Корул айылында сел жүрүп, унаа жолдорго зыян келтирилгени кабарланган.