Turmush — Талас шаарындагы батирлер ижарага канча сомго чейин берилет? Бул суроого аймактык кабарчы жооп алды.

Талас шаарынын 38 жаштагы тургуну Бермет Калдыбаева бир нече жылдан бери өзүнүн 3 бөлмөлүү батирин студент кыздарга ижарага берет.

«Мен жалгыз бой болгондуктан, үйдөгү 2 бөлмөгө студент кыздарды жашатам. Өзү 3 бөлмөлүү батир. Ар бир бөлмөнүн ичинде эмерек жана керебеттери менен 3 кыз жашайт. 1 бөлмө үчүн 6 миң сом төлөшөт. Тамак-аштарын өздөрү алып келип жешет», — деди ал.

Ал эми өзүнүн ысымын билдиргиси келбеген Талас шаарынын тургуну 3 батирин ижарага берерин айтты.

Мен 3 батиримди тең ижарага берем. Алар көп кабаттуу үйлөрдө жайгашкан. Өзүм жер тамда турам. 3 комнаталуу үйүмдө үй-бүлөлүү адамдар жашайт. Алар 18 миң сом төлөшөт. 2 бөлмөлүү үйүмдө студент кыздар жашашат. Ал жердеги 5 кыз 12 миң сом акы беришет. Андан көп жашайбыз дегенде уруксат бербей койгом. Ал эми дагы бир 2 бөлмөлүү батиримде үй-бүлөлү жубайлар жашашат. Анын ичин жакшы ремонт болбогондуктан 8 миң сомго ижарага бергем», — деди ал.

Орточо эсеп менен Талас шаарында бир студенттин батирге ижарасы 2500-3000 миң сомду түзөт.