Turmush — Токтогул районунда мал уурулукка кылмышка шектелген адамдар кармалды. Бул тууралуу бүгүн, 4-декабрда Жалал-Абад ОИИБдин басма сөз кызматы кабарлады.

Маалыматка караганда, Токтогул РИИБге 2 адам арыз менен кайрылышкан. Алар 2023-жылдын 4-ноябрынан 28-ноябрга чейинки аралыкта сарайларынан 1 баш бодо мал жана 3 баш коюн белгисиз кылмышкерлер уурдап кетишкенин билдиришкен. Натыйжада мал ээлери 150 миң сомдук материалдык зыянга учурушкан. Бул фактылар Токтогул РИИБде Кылмыш-жаза кодексинин 205-беренеси (уурдоо) менен катталып, кылмыш иш козголгон.

Токтогул районунун аймагында жүргүзүлүп жаткан «Мал уурулук» операциясынын алкагында жогорудагы кылмыш ишинин бети ачылган. Токтогул РИИБдин кызматкерлери тарабынан кылмышка шектүү катары Үч-Терек айыл аймагынын тургундары —1998-жылы туулган К.Ж., 2002-жылы туулган К.Б. жана Чүй облусунун Москва районунун тургуну 2002-жылы туулган тургуну А.А. кармалып, 2 айга убактылуу кармоочу жайга киргизилди.

Токтогул райондук сотунун токтомунун негизинде К.Ж. жашаган үйгө тинтүү жүргүзүлүп, уурдалган малдарды сойгон 2 бычак, мыйзамсыз сакталган 1 даана сайлуу, 1 даана сайсыз мылтык октору менен табылып, тиешелүү экспертизалар дайындалган. Учурда тергөө амалдары жүрүүдө.