Turmush — Өлкө боюнча эң чоң Баткен токой чарбасында бир да кызматтык унаа жок.

Баткен токой чарба башкармалыгынын башчысы Бактияр Козубаевдин айтымында, унаа жоктугунан чек ара аймактарында кыйынчылык жаралат. Анткени токой чарбанын жерлери 2 анклав менен чектеш аймакта.

«Баткен токой чарбасы Кыргызстан боюнча көлөмү эң чоң токой чарба. Аянты 162410 гектарды түзөт. Мында 40 кызматкер иштейт . Алар тоолорго унаа жоктугунан менчик унаалар менен кээде ат менен барышат. Анткени бизде кызматтык унаа жок. Мурда берилген «Нива» унаабыз экиге бөлүнүп жатат.

Унаанын жоктугунан чек арадагы аймактарга барууда кыйынчылыктар болот. Мына жаз келип жайыт маселелер башталат. Ыкчам иштерди алып барууда унаа керек да. Акыркы 4 жыл мурда «УАЗ» үлгүсүндөгү унаа берилген. Ал чоң болгондуктан күйүүчү майды көп жейт. Учурда май кымбаттагандыктан аны айдаган актабайт. Ал иштетилбей турат. Азыр чек ара аймак катары эске алып унаа берилер деп үмүттөнүп турабыз», — деди Козубаев.

Баткен токой чарбасынын аймагы Өзбекстандын Сох жана Тажикстандын Ворух анклавы менен чектешет.