Turmush — Ысык-Көл айланма жолунун курулушунун алкагында 80,5 чакырымды түзгөн Корумду—Балбай жолун реконструкциялоо иштери башталды.

КР транспорт жана коммуникация министрлигинин Жол чарба депортаментинин Ысык-Көл облусундагы башчысы Бакыт Барктабасовдун айтымында, курулуштун жүрүшүндө Ысык-Көл жана Түп аймагына тийиштүү жол боюндагы дарактар кыйылып жатат. Дарактардын курулушка жарактуусу шакекче жолго аялдама курууга, жыгачтан дараткана, малдуу конуштарга тосмо коюуга жумшалат.

«Балбай—Корумду жолун 4 тилкелүү багытта капиталдык курулушуна даярдык иштери башталды. Анын алкагында бардыгы 80,5 км аралыктан 10 миңден өйдө майда жана чоң бактарды тазалоо мерчемделген. Учурда 15тен ашуун техника менен 4 бригада иштеп, 4 миңге жакын бак-дарак кыйылды. Бул боюнча жергиликтүү тургундарга түшүндүрүү иштери жүргүзүлүп жатат. Алдыда 20 күн аралыгында калган тал-терек тазаланып, курулушка жарактуусу аукционго коюлуп бааланат. Андан соң облустун айланма жолуна 100 аялдама, малдуу конуштарга каша кармалат. Ошондой эле даараткана коюлат», — деди ал.

Буга чейин министрлер кабинетинин төрагасы Акылбек Жапаров бул жолдун жалпы баасы 111,07 миллион долларды түзөрүн айткан.

«Бул каражаттарды бизге өнөктөштөрүбүз: Ислам өнүктүрүү банкы, Кувейт Араб экономикалык фонду, Сауд өнүктүрүү фонду жана ОПЕКтин Эл аралык өнүктүрүү фонду берет. 1,1 млрд сом (12,8 млн доллар) бюджеттен бөлүнгөн», — дегенА.Жапаров.

Жолдун узундугу — 79,3 км. Долбоордун алкагында 4 тилкелүү жол, тротуарлар, жалпы узундугу 79 697 метр болгон веложол, аялдамалар, 14 көпүрө жана 877 суу өткөргүч куруу, анын ичинде 2 жер астындагы жөө адамдар өтүүчү өтмөк, 3 жөө жүргүнчүлөр өтүүчү көпүрө куруу каралган. Курулуш учурунда атмосферага көмүр кычкыл газын чыгарууну жок кылуу максатында пилоттук жана эксперименталдык долбоор катары электр самосвалдары колдонулат.