Turmush — 25-29-май күндөрү Бишкек шаарында Советтер Союзунун Баатыры Дүйшөнкул Шопоковдун жаркын элесине арналган бокс боюнча эркектер жана кыз-келиндер арасында салттуу эл аралык турнир өттү. Бул турнирге Ош шаарынан 11 мушкер катышты.

Ош шаарынын бокс боюнча башкы машыктыруучусу Турдалы Оморовдун айтымында, 60 кг салмакта 1-орунду Сейитбек уулу Мунарбек, 67 кг салмакта Нурсаид Иминжанов 1-орунду багындырды. Турнирдин күмүш медалын 60 кг салмакта Азизбек уулу Баяман жана 63,5 кг салмакта Жантөрө Ташиев тагынса, 63,5 кг салмактагы Мирзахит Имамназаров 3-орунга ээ болду.

Машыктыруучулар штабы белгилегендей, Ош шаарынын мушкерлери мындай көрсөткүчкө биринчи жолу жетишти.

Кыргызстан, Казакстан, Өзбекстан, Кытайдан келген спортчулар катышкан мелдеш эркектер арасында 13, кыз-келиндер арасында 12 салмакта өттү. Аталган турнир өлкөбүздө 40 жылдан ашуун убакыттан бери өткөрүлүп келе жатат.