Turmush — Ош шаарында ИИМдин жол кыймылынын коопсуздугун камсыздоо боюнча башкы башкармалыгынын кызматкерлеринин катышуусунда самбо боюнча биринчилик болуп өттү. Бул тууралуу Ош ШИИБи боюнча милициянын кайгуул кызматынан билдиришти.

Маалыматка караганда, мелдеш кызмат учурунда каза болгон кайгуул кызматкерлеринин жаркын элесине арналып уюштурулган. Биринчиликке аталган башкармалыктын Чүй, Ысык-Көл, Талас, Нарын, Ош, Жалал-Абад, Баткен облустарында иштеген кызматкерлер катышкан.

Биринчилик 6 салмак категорияда болуп, бардык 1-орунду Бишкек шаарынын кызматкерлери, 2-орунду Ош облусунун курама командасы (Баткен облусунун кызматкерлери да кошулган), 3-орунду Ош шаарынын командасы ээледи. Мелдеште жеңүүчү болгондорго ардак грамоталар жана медалдар тапшырылды.