Turmush — Кара-Кулжа районунда сел кесепеттерин жоюу иштери аткарылууда. Бул тууралуу ӨКМдин басма сөз кызматы билдирди.

Маалым болгондой, кечээ, 20-апрелде саат 20:30 чамасында катуу жааган жамгырдан улам сел жүргөн.

Мырзаке—Кара-Кулжа—Алайкуу унаа жолунун 41-чакырымын сел калдыктарынан тазалоо үчүн №26 ЖТИден 1 грейдер жана айыл өкмөтүнөн жүктөгүч тартылган, учурда унаа жол бир тараптуу ачык;

Кара-Кочкор айыл аймагынын Ак-Кыя айылында 12 турак үйдүн жертөлөсүнө сел суулары кирген;

Ылай-Талаа айыл аймагынын Ылай-Талаа айылында 20 турак үйдүн короолорун сел каптап, анын ичинен 5 турак үйдүн ичине сел суулары кирген.

Бүгүн 2 айылда селдин кесепеттерин жоюу иштерине КР ӨКМдин Ош облустук башкармалыгынын ыкчам тобу, ӨКМден 3 кызматкер, Кара-Кулжа райондук ӨКБдан 11 куткаруучу, мотопомпа, №26 ЖТИден жүктөгүч, жарандык коргонуу кызматтары жана жергиликтүү бийлик тартылган.

Алай районунда дагы сел кесепеттерин жоюу иштери жүрүүдө.

Маалым болгондой, кечээ, 20-апрелде саат 17:45 чамасында жааган мөндүрдүн кесепетинен Ош облусунун Алай районунун Тилектеш айыл айылмагынын Тогуз-Булак айылында 5 кокту-колоттон сел жүрүп, 34 турак үйдүн короосун каптаган. Анын ичинен 5 турак үйдүн жана мектептин жертөлөсүнө сел суусу кирген.

Мындан сырткары, ички чарбалык унаа жолдун 5 жерин сел каптаган. Учурда жол каттамы ачык. Ал эми сел түшкөн коктулардагы ички көчөлөр жабык.

Бүгүн селдин кесепеттерин жоюу иштерине Алай райондук ӨКБдан 15 куткаруучу, ӨКМЖБД 3 кызматкер, райондук жарандык коргонуу кызматтарынан 50 кызматкер, айыл өкмөтүнөн 10 кызматкер, 2 жүктөгүч, жергиликтүү тургундардан 20 жаран, суу чарба кызматынан самосвал тартылган.

2024-жылдын 20-апрелде катталган селдин кесепетинен Жаңы-Арык—Кызыл-Суу ички чарбалык унаа жолунун 19-чакырымы сел сууларынан жабыркап, жол каттамы убактылуу жабылган.

Ошондой эле, Алп-Ордо айылында 8 турак үйдүн короолоруна кирген сел суулары жерге сиңип кеткен.

Бүгүн аталган унаа жолун калыбына келтирүү үчүн №45 ЖТИден экскаватор, самосвал, манипулятор жана айыл өкмөттөн 2 жүктөгүч тартылып, саат 10:30да жол каттамы бир тараптуу ачылган.

Мындан сырткары, жерине КР ӨКМдин Ош облустук башкармалыгынын ыкчам тобу тартылган.