Turmush — Талас облустук өнүктүрүү фондунун жетекчиси Эмир Тыныбеков камакта калтырылды. Бул тууралуу Талас облустук сотунун басма сөз кызматы билдирди.

Маалыматка караганжа, бүгүн, 8-июнда Тыныбековдун баш коргоо чарасы кайрадан каралып, 15-июнга чейин камакка алынды.

УКМК кармаган 5 адамдын ичинен бири — Талас облустук өнүктүрүү фондунун жетекчиси Эмир Тыныбеков камакта калып, калган төртөө үй камагына чыкты. Алар: президенттин Талас облусундагы мурдагы ыйгарым укуктуу өкүлү Бакытбек Нарбеков, Талас шаарынын мурдагы мэри Аскар Шабданов, Талас облусунун курулуш жана инженердик инфраструктура башкармалыгынын мурдагы жетекчиси Саламат Салыбаев жана «Ника KG» компаниясынын өкүлү Амантай уулу Адилет.

Буга чейин УКМК Талас шаарындагы тигүү фабрикасы боюнча бир нече адам кармалганын билдирген.

«Тигүү фабрикасын куруу боюнча пайдасыз келишим түзүлгөн жана «Ника KG» курулуш компаниясынын эсебине мыйзамсыз 25 млн сом которулган. Буга байланыштуу Кылмыш-жаза кодексинин 337-беренесинин (Кызмат абалын кыянаттык менен пайдалануу) 3-бөлүгү боюнча кылмыш иши козголгон», — деп айтылган маалыматта.

Ошондой эле, 2022-жылы апрелде Талас облусун өнүктүрүү фондунун Байкоочу кеңеши 82 миллион сомдук тигүү фабрикасын куруу демилгесин долбоордук-сметалык документи жана курулуштун максатка ылайыктуулугу боюнча корутундусу жок жактырышкан. Андан тышкары, долбоордун наркын жасалма түрдө жогорулатышкан.

Тигүү фабрикасын куруу укугуна «Ника KG» жоопкерчилиги чектелген коому ээ болгон. Келишим боюнча, бардык аткарылган жумуштар кабыл алынгандан кийин акча төлөнмөк. Бирок Талас облусун өнүктүрүү фондунун директору Э.Т.Т. президенттин Талас облусундагы мурдагы өкүлү Н.Б.Н.нын көрсөтмөсү менен Талас облусунун капиталдык курулуш башкармалыгынын катынын негизинде «Ника KG» компаниясына 25 млн сом которгон. Алдын ала маалымат боюнча, бул акчадан «откат» алынган.

Бул ишке Архитектура, курулуш жана турак жай-коммуналдык чарба мамлекеттик агенттигинин адистери тартылып, долбоордук-сметалык документтер текшерилген. Анын жыйынтыгында курулуштун баштапкы этабында эле 7 млн 38 миң 265 сомдук жумуштар аткарылбаганы аныкталган.

Кылмыш иштин алкагында 18-майда 5 адам кармалган. Алар:

— президенттин Талас облусундагы мурдагы ыйгарым укуктуу өкүлү Н.Б.Н. (Нарбеков Бакытбек Наркулович);

— Талас шаарынын мурдагы мэри Ш.А.А. (Шабданов Аскар Адылбекович);

— Талас облусун өнүктүрүү фондунун директору Т.Э.Т. (Тыныбеков Эмир Токонович);

— Талас облусунун курулуш жана инженердик инфраструктура башкармалыгынын мурдагы жетекчиси С.С.О. (Салыбаев Саламат Обозканович);

— «Ника KG» компаниясынын өкүлү А.у.А..

• Юстиция министрлигинин маалыматы боюнча, «Ника KG» компаниясынын негиздөөчүсү жана жетекчиси катары Өмүрзаков Таалайбек Өмүрзакович көрсөтүлгөн.