Turmush — Бүгүн, 11-апрель күнү Ош шаарынан кыз ала качууга шектелген жигиттер Кара-Кулжа районунун Кара-Кочкор айылынан кармалды. Бул тууралуу Ош облустук Жол кыймылынын коопсуздугун камсыздоо бөлүмүнүн басма сөз кызматы билдирди.

Маалыматка караганда, милиция бүгүн саат 16:30 чамасында Ош шаарынын тургуну А. аттуу кызды «Мерседес-Бенц» үлгүсүндөгү автоунаага салып ала качып кетишкени кабарланган. Ыкчам аракеттердин жүрүшүндө Кара-Кулжа райондук жол кыймылынын коопсуздугун камсыздоо бөлүмчөсүнүн башчысы Айбек Осеков тарабынан Кара-Кулжа районунун Кара-Кочкор айылындагы чоң жолдо автоунаа токтотулуп, ала качып кетти делген 2005-жылы туулган А.А. аттуу кыз жана ала качууга шектелген Кара-Кулжа районунун 2002-жылы туулган тургуну А.Б., унаанын айдоочусу, Ош шаарынын 1999-жылы туулган тургуну М. уулу Д. кармалды.

Кармалгандар тергөө кызматына өткөрүлүп, унаа убактылуу токтотуучу жайга киргизилди.