Turmush — Кемин районунун Белек Солтоноев атындагы Тегирменти орто мектебинде орус тили жана адабияты сабактарынан билим берген Эльвира Чимурбаева болочоктогу жолдошу менен кокусунан таанышып, дароо эле бирин-бири жактырып калышкан. Ошентип каарманыбыз Тегирменти айылына 2012-жылы келин болуп келген. Учурда күйөөсү Таалайбек уулу Өмүрбек экөө 2 уул, 2 кызды тарбиялап жатышат. Аны менен аймактык кабарчы таанышты.

Эльвира Чимурбаева Токмок шаарында 1992-жылы туулган.

«2011-жылы ноябрь айында Токмок шаарындагы кафелердин бирине кирип калдым. Ал жакта жолдошум Таалайбек уулу Өмүрбек дагы жүргөн экен. Экөөбүз теӊ бири-бирибизди карап, көздөрүбүз чагылышып кетти. Чынында жактырып калдым. Ал дагы мени жактырып калганы көз карашынан билинип турду. Ошентип таанышып, 2012-жылы февраль айында баш коштук», — деди ал.

Эльвира айым 2008-жылы Токмок шаарындагы №2 орто мектебинде 9-классты аяктап, шаардык маданият колледжинин хор жетектөө бөлүмүнө тапшырып, аны 2012-жылы артыкчылык менен аяктаган.

«2012-жылы Билим берүү кыргыз академиясынын орус тили жана адабияты бөлүмүнө тапшырып, аны 2015-жылы аяктадым. Эмгек жолумду 2014-жылы Кемин районунун Белек Солтоноев атындагы Тегирменти орто мектебинде музыка мугалими болуу жана хор ийримин жетектөө менен баштагам. 2016-жылдан бери орус тили жана адабияты мугалими, хор ийриминин жетекчиси болуп эмгектенип келем.

2019-жылы «Жыл мугалими» зоналык кароо-сынагында 3-орунга, 2023-жылы «Жыл мугалими» зоналык каро-сынагында 1-орунга ээ болуп, райондук сынакта 3-орунду ээледим. Үзүрлүү эмгегим үчүн айыл өкмөттүн, райондук билим берүү бөлүмүнүн ардак грамоталары менен сыйландым.

Бош убактымды үй-бүлөм, балдарым менен өткөрөм. Хоббим — тамак жасоо, ырдоо», — деди каарманыбыз.

Анын атасы Талантбек Чимурбаев, апасы Света Дүйшөналиева. Өзү беш бир тууган.