Turmush — Чүй облусунун Токмок шаарындагы №3 мектепте 10 жыл бою жалаӊ эркек балдар окуган. Директордун тарбия иштери боюнча орун басары Жамиля Мыйтанова Turmush басылмасынын кабарчысына мектеп тууралуу айтып берди.

Бул мектептин имараты 1937-жылы курулуп баштаган.

«1937-жылы Токмок шаарынын Пролетар көчөсүндөгү майыптар артелинин бакчасынын аймагында мектеп курула баштаган. Ал жылы дубал тургузулуп, жыгачтар даярдалган. 1938-жылдын жазында курулуш иштери кайрадан башталып, 1-сентябрга карата мектеп даяр болгон. Анда биринчи директор болуп Лиманов Герман Иванович дайындалган (1937-1964-жылдары директор болгон). Алгачкы окуу жылында мектепте 20 класс даярдалып, окуучулар эки нөөмөт менен билим алышкан. №4 мектеп деп аталган. Мектеп иштегенине 2 жыл болгон соӊ 26 окуучу аяктаптыр. 1939-1940-окуу жылында окуу кабинеттери жана китепкана толукталган. Мектеп уюшулганына аз гана убакыт болсо да, олимпиадада шаар боюнча 1-орунду, облустук сынакта 5-орунга ээ болгон экен.

1941-жылдын июнь айында Улуу Ата Мекендик согуш башталып, август айына чейин мектепте аскер жыйноо пункту жайгашкан. 1941-жылдын 15-сентябрында окуу кадимкидей улантылып жаткан. Дал ошол күнү мектептин директору шаардык аткаруу комитетине чакырылып, 4 саатта мектепти бошотуп берүү сунушталган. Окуучулар парталарды, отургучтарды, доскаларды, эмеректерди алып, мектептен чыгышкан. 16-сентябрда алар ал кездеги №1 мектепке (азыркы №4 мектеп) сабакка барышкан. Ошентип аталган орто мектеп өз ишин токтотуп, аскердик госпиталга айланып, октябрь айынан тарта жарадар жоокерлер, офицерлер келе баштаган.

Мектептин дагы бир кызык жагы — 1943-1953-жылдары Токмок шаарындагы жалгыз эркек балдар мектеби болгон. Эмне себептен жалаӊ эркек балдар окуп калганы бизге белгисиз. Ал эми 1953-жылдан тарта жалпы билим берүүчү мектеп макамын алган», — деди ал.

Учурда №3 мектепте 1900дөн ашуун окуучу билим алат.

• Артель — бир нече адамдын, чарбанын бирге иштөө үчүн өз ыктыяры менен биригиши.