Turmush — Ысык-Көлдө катталган жол кырсыктан улам 2 адам көз жумду. Бул тууралуу ЖКККБдан билдиришти.

Маалыматка караганда, бүгүн, 3-март күнү саат 07:20 чамасында 1983-туулган Т.Т. өзүнө тиешелүү болгон «Мицубиси» үлгүсүндөгү унаасын батыштан чыгышты көздөй башкарып бара жаткан. Балыкчы—Ананьев—Каракол унаа жолунун 24-чакырымында, тактап айтканда Тору-Айгыр менен Кызыл-Өрүк айылдарынын ортосунан рулга ээ боло албай, карама каршы тилкеге чыгып кеткен. Анда Бишкек шаарынын 1984-жылы туулган тургуну Т.А.нын башкаруусундагы жүргүнчү ташуучу «Мерседес-бенц Спринтер» үлгүсүндөгү унаасы менен сүзүшүп, жол кырсыгына учуруган.

• Натыйжада «Мицубиси» унаасынын айдочусу Т.Т. жана жүргүнчүсү — Бишкек шаарынын 1983-жылы тургуну О.Э. окуя болгон жерде каза болушкан.

Кырсыктын кесепетинен жалпысынан 18 адам жабыркаган. «Мицубиси» унаасынын үч жүргүнчүсү — Д.О., М.Н., Б.Н., кичи автобустун айдоочусу жана жүргүнчүлөрү — А.Д., Н.Э., А.Н., С.Ж., М.С., К.И., А.А., Д.Т., К.С., Г.П., С.К., Ш.Р., Б.А., К.Н. ар кандай жаракаттар менен Балыкчы аймактык ооруканасына жеткирилген.