Turmush — Нарын облусунун Ак-Талаа районунун Баетов—Кош-Дөбө унаа жолунда катталган жол кырсыктан 3 адам каза болду.

Аймактык кабарчы билдиргендей, 23-июлда болжол менен саат 17:00 чамасында Кара-Бүргөн айыл аймагында «Хонда Одиссей» менен «Дэу Нексия» кагышып, анын кесепетинен «Дэу Нексия» унаасындагы 1 эркек киши, 1 келин, 1 жаш бала окуя болгон жерден каза болгон. Мындан тышкары, ушул эле унаадагы бир адам оор абалда Ак-Талаа райондук ооруканасынын жандандыруу бөлүмүнө жеткирилген.

Такталган маалыматтарга таянсак, «Дэу Нексия» үлгүсүндөгү жүргүнчүлөр Нарын районунун Эмгек-Талаа айылынын жашоочулары болгон. Ал эми «Хонда Одиссей» унаасындагы жүргүнчүлөр Ак-Талаа районунун Коңорчок айылынын тургундары болгон. Алар дагы ооруканага ар кандай жаракаттар менен жеткирилген.

Ак-Талаадагы хирургия бөлүмүнүн хирургу Жылдызбек Мурзабек уулу жаракат алгандардын баш мээси чайкалгандыгын айтты.

«Кечээ болгон жол кырсыгынан улам учурда хирургия бөлүмүндө 4 адам жатат. Алардын биринин буту сынып кеткен, үчөөнүн баш мээси чайкалган. Абалдары жакшы. Булардан тышкары бир адам эс-учун жоготкон абалда келип, жандандыруу бөлүмүнө жаткырылган. Учурда өзүнө келип калды деп жатышат», — деди хирург.

Видеодон талкаланган унааларды көрүүгө болот. Аларды бири экиге бөлүнүп калган.