Turmush — Ош шаарындагы батирлердин биринде милиция кызматкери — аял киши асынган абалда табылды. Бул тууралуу Turmush басылмасына өздүк булактар билдирди.

Алдын ала маалымат боюнча, ал — Ноокат районунун 1985-жылы туулган тургуну О.А. Ош шаардык ички иштер башкармалыгынын Сулайман-Тоо милиция бөлүмүндө милициянын ыйгарым укуктуу өкүлү (аймактык тескөөчү) болуп эмгектенип жаткан.

Анын сөөгү 23-январда түндө өзү жашаган батирден табылган. Жакындары аны менен байланышка чыга албай, ал жашаган үйгө издеп барганда эшигин ачкан эмес. Алар терезеден кирип, О.А.ны асынган абалда табышкан.

Бүгүн, 24-январь күнү маркум акыркы сапарга узатылды.

Ал эми Ош шаардык ички иштер башкармалыгынын басма сөз кызматы бул окуя болгонун тастыктап, кийинчерээк толук маалымат бериле турганын билдирди.