Turmush — Ош облусунун аймагында 2024-жылдын 25-мартынан 3-апрелине чейин УКМК менен биргеликте ведомстволор аралык «Экстремист» аталышындагы ыкчам иликтөө жана алдын алуу иш-чарасы жүргүзүлдү.

Анда Кара-Суу, Өзгөн, Ноокат, Араван, Кара-Кулжа, Алай жана Чоң-Алай райондорунда жергиликтүү бийлик өкүлдөрү жана дин өкүлдөрүнүн катышуусунда экстремизмдин алдын алуу боюнча жыйындар өттү.

Милиция кызматкерлери УКМК менен биргеликте жүргүзгөн ыкчам алдын алуу иш-чараларынын натыйжасында Өзгөн районунун тургундары — 1971-жылы туулган Э.К., 1972-жылы туулган С.А., 1976-жылы туулган М.Ш. жана Кара-Суу районунун тургундары — 1969-жылы туулган И.А. 1972-жылы туулган И.И. «Хизб-ут-Тахрир» экстремисттик уюмунун мүчөсү болуудан өз каалоосу менен баш тартышты.

Алар «Хизб-ут-Тахрир» экстремисттик уюмунун ишмердүүлүгү туура эместигин айтып, жарандарды аталган уюмга кошулуудан алыс болууга чакырышты.