Turmush — Ош шаарында таза жана саркынды сууларга болгон төлөмдөрдүн баасы көтөрүлөт. Тиешелүү токтомду шаардык кеңеш 2022-жылы 27-сентябрда кабыл алды.

• Учурда таза сууга болгон төлөм 5,31 сомду түзөт.

• Акыркы жолу тариф 2021-жылы жогорулатылган.

Ош шаардык кеңешинин токтому:

1. Ош шаарында калктын таза жана саркынды сууларга болгон төлөмдөрүнүн баалары ичүүчү сууга 1м3 үчүн 6 сом 88 тыйын, саркынды сууларды кабыл алуу жана тазалоого 4 сом 20 тыйын өлчөмүндө бекитилсин.

2. Калктын таза жана саркынды сууларга болгон төлөмдөрү 2023-жылдын 1-январынан баштап жаңы баа боюнча жүргүзүлсүн.

Кыргыз Республикасынын «Жергиликтүү мамлекеттик администрация жана жергиликтүү өз алдынча башкаруу органдары жөнүндө» мыйзамынын 34-беренесинин жана «Ош шаарынын статусу жөнүндө» мыйзамынын 15-беренесин жетекчиликке алып, Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматынын 2022-жылдын 9-августундагы «Ошшаарсууканал» муниципалдык ишканасынын товарларына (жумуштарына, кызмат көрсөтүүлөрүнө) бааларына (тарифтерине) макулдук берүү жөнүндө» №4 буйругунун негизинде Ош шаарынын вице-мэри С.Жунусбаевдин маалыматын угуп жана талкууланды. Шаардык кеңештин транспорт, жылуулук-энергетикалык комплекс, муниципалдык чарба жана байланыш маселелери боюнча туруктуу депутаттык комиссиясынын 2022-жылдын 1-сентябрындагы №9 чечими, ошондой эле сессиянын жүрүшүндө депутаттар тарабынан айтылган сунуштар эске алынды.