Turmush — Каракол шаарында автоээнбаштык жасагандыгы үчүн айдоочуга 15 миң сом айып пул салынды. Бул тууралуу Ысык-Көл ОИИБдин басма сөз кызматынан билдиришти.

16-март күнү социалдык тармактарда видео тарап, «Мерседес-Бенц» үлгүсүндөгү унаанын айдоочусу Каракол шаарынын №11 мектеп-гимназиясынын жанында автоээнбаштык кылып, кетип калганы маалымдалган.

Бул факт Ысык-Көл ОИИБ боюнча ЖКККБнын инспекторлоруна кабарланып, айдоочунун өздүгүн аныктоо жана аны жоопкерчилкке тартуу боюнча тапшырмалар берилген.

17-март күнү милиция кызматкерлери мектептин жанында автоээнбаштык кылган айдоочунун өздүгүн аныктоого үлгүрүштү. Ал Каракол шаарынын 22 жаштагы тургуну Ш.С. болуп чыкты.

Айдоочуга карата Укук бузуулар жөнүндө кодексинин 189-беренесинин (автоээнбаштык) негизинде протокол түзүлүп, 15 миң сом өлчөмүндө айып пул салынды. Айдоочунун унаасы айып төлөнүүчү жайга токтотулду.