Turmush — Токтогул милициясы мал уурулукка шектелген 4 жаранды кармады. Бул тууралуу Жалал-Абад ОИИБдин басма сөз кызматы билдирди.

Маалым болгондой, Токтогул РИИБге 30 жаштагы район тургуну арыз менен кайрылып, 2023-жылдын 23-ноябрында базар баасы 75 000 сомдук 1 баш букасын белгисиз адамдар уурдап кетишкенин билдирген.

Бул окуя Токтогул РИИБ тарабынан Кылмыштардын бирдиктүү реестрине Кыргыз Республикасынын Кылмыш-жаза кодексинин 205-беренеси (уурдоо) менен катталып, кылмыш иши козголгон.

Токтогул РИИБдин кылмыш иликтөө бөлүмүнүн кызматкерлери тарабынан жүргүзүлгөн ыкчам-иликтөө иштеринин натыйжасында кылмыш ишине шектүү катары Токтогул районунун тургундары — 1962-жылы туулган Н.Т., 1973-жылы туулган Т.Т., 1975-жылы туулган Д.М. жана 1984-жылы туулган Н.К. кармалып, 2 айга убактылуу кармоочу жайга киргизилген.

Токтогул РИИБдин тергөө кызматы тарабынан Д.М. жана Н.К. аттуу жарандардын үйлөрүнө тинтүү жүргүзүлүп, сайлуу ок атуучу куралдар табылып, тиешелүү экспертизалар дайындалган.

Ыкчам-иликтөө иштеринин жүрүшүндө шектүү жарандардын мындан башка дагы 4 кылмыш ишине тиешеси бар экендиги аныкталган.

Учурда тергөө амалдары жүрүп жатат.