Turmush — Ош облусунун Өзгөн шаарында бийиктиги 1 метр 75 сантиметрди түзгөн хум табылды. Бул тууралуу археологиялык топтун мүчөсү Турарбек Абдырахманов билдирди.

Анын айтымында, табылга Өзгөн архитектуралык-археологиялык музей комплексине жеткирилген.

«Улуттук илимдер академиясынын өкүлү Марс Боронбаев жетектеген археологдор иштеп жатабыз. Атайын ачык кагаз алып, казуу иштери жүрүп жатат. Казуу иштери башталганына 5-6 күн болду.1-март күнү 2,5 метрлик тереңдиктен биздин заманга чейинки VII-IV кылымдагы хум табылды. Толугу менен бүтүн чыкты. Бул табылганы Өзгөн архитектуралык-археологиялык музей комплексине жеткирдик. Ошол жерден жууп тазалоо, изилдөө иштерин жүргүзөбүз. Казуу иштери дагы уланат. Муну менен катар Шоро-Башат маданиятына таандык карапа идиштин сыныктары табылып жатат. Өзгөн шаарын айланып өткөн жол, тарыхый Кызыл-Октябрь деген аталыштагы эски шаардын жанынан өткөндүгүнө байланыштуу археологдор казуу иштерин жүргүзүүдөбүз.

Алдыда дагы көп жаңылыктар болушу мүмкүн. Хумдун бийиктиги 1 метр 75 сантиметр, туурасы 1 метр 30 сантиметр. Учурда 4 археолог 20 жумушчу иш алып бара жатат», — дейт Турарбек Абдырахманов.

Маалым болгондой, президент Садыр Жапаров 2023-жылдын 20-декабрында, «Өзгөн шаарынын айланасында айланма унаа жол куруу жана тейлөө боюнча мамлекеттик-жеке өнөктөштүк долбоорун ишке ашыруу жөнүндө» жарлыкка кол койгон. Анда Ош-Бишкек унаа жолунун Өзгөн шаары аркылуу өтүүчү тилкесинде жол кыймылынын көптүгүнөн, айланма жол куруу зарылдыгы келип чыкканы белгилеген.