Turmush — Ош шаарында унаа токтотууга тыюу салынган жерге токтоп турган жол тандастарды сүрөткө тартып алышты.

Turmush басылмасынын кабарчысына күбөлөр билдиргендей, бүгүн, 16-октябрда эртең менен саат 09:40 чамасында шаардын Алишер Навои көчөсүндө «Chavo» (мурунку «Алай») мейманканасынын алдында 4 жол тандабас токтотулган. Аталган тилкеде унаа токтотууга тыюу салынган белги (3.27) орнотулган.

Токтоп турган унааларга Жогорку Кеңештин депутаттары Жалолидин Нурбаев («Элдик» депутаттар тобу, Араван округу), Акбөкөн Таштанбеков («Элдик» депутаттар тобу, Ысык-Ата округу) жана «Chavo» меймаканасынан чыккан адамдар отуруп кеткен.

Укук бузуулар кодексинин 188-беренеси (транспорт каражаттарынын айдоочуларынын жол кыймылынын эрежелерин бузуусу).

Жол белгилеринин талаптарын, жолдун жүрүүчү бөлүгүндөгү чийиндердин талаптарын аткарбоо (каршы кыймылдын тилкесине чыгуу менен озуп өтүүнү же болбосо маневр жасоо эрежелерин бузууларды кошпогондо); токтоо же токтоп туруу эрежелерин бузуу; коопсуз аралыкты, интервалды сактабоо же болбосо жолдун жүрүүчү бөлүгүндө транспорт каражаттарын жайгаштырууну бузуу же автомагистралдар боюнча жүрүү эрежелерин бузуу; светофордун тыюу салуучу сигналы же жөнгө салуучунун тыюу салуучу жаңсоосу болгондо жол белгилери же жолдун жүрүүчү бөлүгүнүн чийиндери менен белгиленген стоп-линиянын алдында токтоо жөнүндө Жол кыймылынын эрежелеринин талаптарын аткарбоо; каршы кыймыл тилкесине чыкпай туруп кууп өтүү же маневр жасоо эрежелерин бузуу; тышкы жарык берүүчү приборлорду же болбосо эскертүүчү сигналдарды пайдалануу эрежелерин бузуу (бардык механикалык транспорт каражаттарына сутканын жарык убагында калктуу конуштардан тышкары жерлерде фаранын жандырылган жакын жарыгы менен жүрүү талаптарын кошпогондо) — жеке жактарга 10 эсептик көрсөткүч өлчөмүндө, тактап айтканда 1000 сом айып пул салууга алып келет.