Turmush — Ноокен РИИБдин балдар иштери боюнча инспекциясы тарабынан «Милиция кызматкери — менин досум, коргоочум. Спорт менен дени сак да болосуң» аталышындагы мелдеш уюштурулду. Ага Ноокен жана Сакалды айыл аймактарындагы 11 мектептин окуучулары катышты. Бул тууралуу Жалал-Абад ОИИБдин басма сөз кызматы билдирди.

Өспүрүмдөр арасындагы мелдеш спорттун 5 түрүнөн өткөрүлдү: футбол, аркан тартыш, гиря көтөрүү, кыздар, балдар арасындагы кол күрөш жана аралыкка чуркоо.

Спорттук мелдештин жүрүшүндө Ноокен РИИБдин жетекчисинин орун басары Эдилбек Жаркынбаев сөз сүйлөп, иш-чара кылмыштуулуктун алдын алуу жана жаштарды биримдикке чакыруу максатында уюштурулгандыгын айтып өттү.

Оюндардын жалпы упайлык көрсөткүчүндө А.Тургунбаев атындагы №38 орто мектебинин курама командасы 1-орунду багындырып, кубокту жеңип алышты. 2-орунду Паяз атындагы №9 орто мектеби ээлесе, 3-орунду А.Төрөгелдиев атындагы №7орто мектебинин окуучулары камсыз кылышты.

Спорттук иш-чара Аксы РИИБдин кызматкерлери тарабынан дагы уюштурулуп, балдар жана кыздар арасында волейбол өткөрүлдү.

Жеңүүчүлөргө милиция тарабынан диплом жана акчалай сыйлыктар ыйгарылды.