Turmush — Бүгүн, 18-май күнү саат 13:30 чамасында Кадамжай районунда мөндүр аралаш жааган жаандын кесепетинен кокту-колоттордон түшкөн сел акты. Бул тууралуу ӨКМден кабарлашты.

Маалыматка караганда, суу Кадамжай РИИБдин имаратынын жертөлөсүнө жана Зведная көчөсүндө жайгашкан өрткө каршы куткаруу бөлүмүнүн чарбагына кирген. Тазалоо иштерине 6 куткаруучу тартылып, учурда мотопомпа менен сууну тарттыруу иштери жүргүзүлүп жатат.

Буга чейин жергиликтүү тургундар бүгүн, 18-майда саат 15:00 чамасында катуу жааган жамгырдан улам Кадамжай районунун Пүлгөн айылында сел жүргөнүн билдиришкен.

Маалыматка караганда, учурда сел айыл ичиндеги ички жолдордо жана Ош—Баткен—Раззаков жолунда агып жатат. Унаалардын каттамы токтоп турат.