Turmush — Ысык-Көл районунда үч милиция кызматкери адам куткарууда ыкчам аракеттерди көрүп, кызматтык жана жарандык милдетин аткаргандыгы үчүн акимчилик тарабынан сыйланды.

Аймактык кабарчы билдиргендей, аларды Ысык-Көл райондук мамлекеттик администрация башчысы Калыбек Жумадылов кабыл алып, ыраазычылык кат жана чакан белек тапшырды.

Эске салсак, Чок-Тал айылындагы «Лазурный берег» эс алуу жайында 20-июль күнү саат 20:30 чамасында 2004-жылы туулган Т.Б. көлгө чөгүп жатканда милициянын прапорщиги Алымбек уулу Адыл менен кенже сержант Бактыбек уулу Сыймык өз учурунда куткаруу иштерин жүргүзүп, аман сактап калышкан.

Ошондой эле, Булан-Сөгөттү айылындагы «Costa Brava» эс алуу жайында 21-июль күнү эс алуучулардын 10 жаштагы кызын көлгө чөгүп жаткан учурда милициянын старшинасы Каныбек уулу Эдик өз учурунда байкап, куткарып калган.