Turmush — Манас районунда мыйзамсыз сакталган экстремисттик уюмдун үгүт материалдары алынды. Бул тууралуу бүгүн, 19-апрелде ӨКМден кабарлашты.

Маалыматка караганда, Талас ОИИБдин экстремизмге мыйзамсыз миграцияга каршы күрөшүү кызматы, УКМК кызматкерлери менен бирдикте ыкчам иш-аракеттерди алып барышууда. Анын негизинде 14-март күнү 1962-жылы туулган Е.К.нын Манас районунун Чеч-Дөбө айылындагы​ үйүнө тинтүү жүргүзүлгөн. Тинтүү учурунда ​үйүнөн 8-даана «Ал-Ваъй», 2 даана «Исламий Шахиясы», 1 даана «Ислам түзүмү», 1 даана «Халифалык кандай кулатылган?» жана 1 даана «Исламда ижтима түзүмү» аттуу окуу ​ журналдары табылган. Аталган журналдарга соттук-линвгистикалык жана дин таануу комплекстүү экспертиза дайындалып, анын корутундусуна ​ ылайык алар «Хизб-Ут-Тахрир аль Ислами» экстремисттик уюмунун үгүт материалдары деп табылды.

Аталган факты боюнча Манас РИИБде Кылмыш-жаза кодексинин 332-беренесинин 1-бөлүмүндө (экстремисттик материалдарды даярдоо, таратуу) менен кылмыш иши козголгон.

Кылмышка шектүү Е.К. Манас районунун Чеч-Дөбө айылынын тургуну, мурда соттолгон. 2015-жылдан бери «Хизб-Ут-Тахрир аль Ислами» экстремисттик уюмунун мүчөсү катары каттоодо турат. Азыркы күндө Е.К. аталган журналдарды кайсы жактан алгандыгын, эмне максатта өзүнүн үйүндө сактап жүргөндүгүн аныктоо боюнча тергөө аракеттери жүргүзүлүп жатат.