Turmush — Бүгүн, 21-мартта Нарын шаарында Т.Усубалиев атындагы борбордук аянтта Нооруз майрамына карата өткөн салтанаттуу иш-чара менен бирге көчөттөр отургузулду. Бул тууралуу аймактык кабарчы билдирди.

Маалыматка караганда, иш-чарага Эмгек, социалдык камсыздоо жана миграция министри Кудайберген Базарбаев, дубан башчысы Сабыркул Ашимбаев, Нарын шаарынын мэри Канболот Тутуев, Нарын райондук мамлекеттик администрациясынын башчысы-аким Нуридин Мадимаров баштаган бир катар ишкана-мекеме өкүлдөрү жана жергиликтүү тургундар катышты. Анда куттуктоо сөздөрү айтылып, сүмөлөк таратылып, маданият кызматкерлери тарабынан даярдалган концерттик программа тартууланды.

Майрамдык иш-чара жыйынтыкталган соң министр баштаган жетекчилер шаардын борбордук бөлүгүнө, Ленин көчөсүнүн боюна арчанын көчөттөрүн отургузууга катышты.