Turmush — Кочкор районундагы Кош-Дөбө айыл аймагынын тургундары Ормон хан Ниязбек уулунун ысымын аймактык реформадан кийинки бириктирилген айыл аймакка коюп берүү боюнча демилге топ түзүштү. Бул тууралуу аймактык кабарчы билдирди.

Буга чейин айрым айыл-райондордун аталыштарын өзгөртүүгө багытталган мыйзам долбоору парламентте үчүнчү окуудан өткөн. Ага ылайык, Нарын облусунун Кочкор районунун Кош-Дөбө айыл аймагы Ормонхан айыл аймагы деп аталмак. Бирок Кочкор районунда жүргүзүлүп жаткан административдик аймактык реформага ылайык, райондогу 11 айыл өкмөтү кыскарып, 5 айыл аймакка бириктирилет.

«Кош-Дөбө айыл аймагы, Ак-кыя айыл аймагы, Кочкор айыл аймагы, Көк-Жар айыл аймагы, Семиз-Бел айылы бириктирилип, бир аймак болору тууралуу мерчемделүүдө. Ошого байланыштуу Ормон хандын ысымы Кош-Дөбө айыл аймагына берилген менен айыл аймактары бириккенде өзүнөн-өзү жоюлуп калганы турат. Ошондуктан Кош-Дөбө, Ак-Кыя, Семиз-Бел, Көк-Жар, Кочкор айыл аймагын бириктирип, аны Ормон хан айыл аймагы деп атап берүүнү өтүнөбүз», — деген демилге топтун мүчөлөрү президенттин Нарын облусундагы ыйгарым укуктуу өкүлүнө, Кочкор районунун акимине кат жолдошууда.

Демилге топту түзүү боюнча жыйындар Кара-Саз, Кара-Күнгөй айылдарында өттү. Жыйындар башка айыл өкмөттөрдө да өткөрүлүп, бириктириле турган айылдарда да демилге топтор түзүлүүдө.