Turmush — Ош облусунун Алай районундагы Корул айыл өкмөтүнүн эли каражат топтоп, Кең-Жылга айылындагы 1 км 800 метр жолго асфальт төшөдү. Бул тууралуу аталган айыл өкмөттүн башчысы Мустафа Турганбаев билдирди.

Анын айтымында, жол курууга 8 млн сомго жакын каражат жумшалды. Демөөрчүлөрдүн көбү — Корул айыл аймагынын чет жактарда жана Бишкек шаарында иштеп жүргөн тургундары.

«Жолду курууда техникалар мамлекет тарабынан берилип, асфальт төшөлдү. Каражат жергиликтүү эл тарабынан топтолду. Жалпы 8 млн сомдой жумшалды. Пенсиясынан 1000 сом бергендер болду. Буга чейин жолдун абалы өтө начар болчу. 12-ноябрда колдонууга берели деп жатабыз», — деди Мустафа Турганбаев.

Айыл өкмөт башчы Тогуз-Булак айылында да жергиликтүүлөрдүн каржылоосу менен көпүрө курулуп жатканын кошумчалады. Буга чейин бул жердеги көпүрөнү сел бузуп кетип, тургундарга бир топ көйгөйлөрдү жаратып келген.