Turmush — Ысык-Көл облусунда адашып кеткен туристтерге жардам көрсөтүлдү. Бул тууралуу ӨКМдин басма сөз кызматы билдирди.

Маалыматка ылайык, туристтер 3-августта Чүй облусуна караштуу Чоң-Кемин районунун Кайыңды айылынан Чоң-Кемин капчыгайы аркылуу Ысык-Көл облусуна караштуу Ысык-Көл районундагы Григорьевка капчыгайына өтмөк болушкан. Алардын ичинен Австрия мамлекетинин 3 жараны Чоң-Ак-Суу ашуусунда адашып кетишкен.

Ал эми Германиянын 2, Австрия мамлекетинин 1 жараны 4-августта Чоң-Ак-Суу капчыгайынан жергиликтүү тургундардын унаасы менен Григорьевка айылына түшүшкөн. Алар адашып кеткен туристтер боюнча 112 кызматына кайрылышкан.

Ысык-Көл райондук ӨКБнын офицери, улук лейтенант Калыс Жумабаев чет элдик туристтер менен жеринде сүйлөшүп, маршруттан адашып калган 3 чет элдик жаран боюнча маалыматты тактаган.

2023-жылдын 5-августунда Чон-Ак-Суу ашуусунун этегине чейин издѳѳ иштери жүргүзүлүп, жоголгон туристтер саат 14:20 чамасында Жайылма коктусунун этегинен табылган. Куткаруучулар аларды аттар менен түшүрүп, Австрия мамлекетинин консулу менен байланыштырышкан.