Turmush — Ат-Башы районундагы жол кырсык боюнча ишти райондук ички иштер бөлүмүнөн облустук ички иштер бөлүмүнө которуу өтүнүчү менен Айнагүл Бекбоева башкы прокурорго кайрылды.

• 14-сентябрда Ат-Башы айылындагы «Чатыр-Көл» кинотеатрында башкы прокурор Курманкул Зулушев, министрлер кабинетинин төрагасынын биринчи орун басары Адылбек Касымалиев, президенттин Нарын облусундагы ыйгарым укуктуу өкүлү Алтынбек Эргешов жана башкалар Ат-Башы районунун эли менен жолукту.

Жолугушууда Нарын районунун Байзак айылынан келген Айнагүл Бекбоева: «2022-жылдын 1-сентябрь түнү райондук сугат тармактар башкармалыгынын жетекчиси М.Ж. мас абалында унаа башкарып бара жатып, оор жүк ташуучу унааны сүзгөн. Ал унаада менин уулум болгон. Учурда ал Ат-Башы райондук ооруканасынын жандандыруу бөлүмүндө жатат. Ал эми М.Ж. жазаланбай, кызматта иштеп жүрөт. Азыр күнөөнү уулум Канат Бакытбековго оодарганга аракет жасалып жатат.

50:02-52:14 мүнөттөн баштап көрүү керек.

Жалпы 3 киши жандандыруу бөлүмүндө жатат. Ушул ишти райондук ички иштер бөлүмүнөн облустук ички иштер бөлүмүнө которуп берүүңүздөрдү суранам», — деди ал.

Башкы прокурор Курманкул Зулушев ишти облустук ички иштер башкармалыгына өткөрүп берүүнү жана аталган жетекчинин кызматтык абалын кароону тапшырды.

Буга чейин Ат-Башы районундагы жол кырсыкта 4 адам жаракат алгандыгы айтылган. Нарын ОИИБдин басма сөз кызматынын маалыматына караганда, 2022-жылдын 1-сентябрында саат 23:50 чамасында Бишкек—Нарын —Торугарт унаа жолунда Нарын районунун 1992-жылы туулган тургуну Б.К. «Volvo » үлгүсүндөгү унаасы менен Нарын шаарын көздөй бара жатып, Ат-Башы районунун 1965-жылы туулган тургуну М.Ж.нын башкаруусундагы «Тойота Камри» үлгүсүндөгү унаа менен кагышкан.

Жол кырсыктын кесепетинен «Тойота Камри» үлгүсүндөгү унаанын жүргүнчүлөрү — Ат-Башы районунун тургундары — 1973-жылы туулган М.Н., 1965-жылы туулган Э.Т., 1986-жылы туулган Н.Т. Ат-Башы райондук оорукананын кайра жандандыруу бөлүмүнө, ал эми айдоочу М.Ж. хирургия бөлүмүнө жаткырылган.