Turmush — Жалал-Абад облусунда 2022-жылы 27 950 ымыркай төрөлүп, 1 жашка чейинки 382 баланын өлүмү катталган. Бул тууралуу кечээ, 1-февралда өткөн коллегиялык жыйында айтылды.

Президенттин Жалал-Абад облусу боюнча ыйгарым укуктуу өкүлүнүн орун басары Эркин Маматаевдин баяндамасына караганда, 2022-жылы балдар өлүмүнүн көрсөткүчү 37 учурга азайган.

Өлүмдүн себептери:

— перинаталдык себептерден 217 бала (2021-жылы 241);

— дем алуу органдарынын ооруларынан 72 бала ( 2021-жылы 51);

— тубаса кемтик ооруларынан 44 бала (2021-жылы 64);

— жугуштуу оорулардан 23 бала (2021-жылы 21);

— башка себептерден улам 26 бала (2021-жылы 41) чарчап калган.

Анын айтымында, балдардын өлүмү район-шаарларга алып караганда эң көп Аксы районунда катталып, балдардын өлүмү 11 учурга көбөйгөн. Ошондой эле Токтогул, Таш-Көмүр шаарында да жогорулаган.

Президенттин Жалал-Абад облусундагы ыйгарым укуктуу өкүлү балдар өлүмү боюнча Аксы районунун акиминен райондогу абалды сурады.

«Бул жерде медицина кызматкерлери да тыкыр иштөөлөрү керек. Тигиндей-мындай экен деп койбошубуз керек», — деди ал.

Район акими Замирбек Сыдыков ички, сырткы миграциянын таасири болгонун айтты.