Turmush — Чүй облусунун Жайыл районунун билим берүү мекемелеринин 2022-2023-окуу жылына даярдоо боюнча сынактын жыйынтыгы чыгарылды, деп жазат Turmush басылмасынын кабарчысы.

Анын айтымында, айыл жана шаар мектептери өзүнчө катышты. «Мыкты айылдык мектеп-2022» номинациясында Сосновска орто мектебинин мугалимдер жамааты биринчи орун үчүн 10 миң сом алышты. 2-орунду Ново-Николаев атындагы инновациялык орто мектеп-гимназиясы ээлеп, мугалимдер жамааты 8 мин сом алышты. 3-орунга И.Бегимкулов атындагы Тунук орто мектеби ээ болду. Бул мекемеге 5 миң сом тапшырылды.

Кошумчалай кетсек, сынакка активдүү катышкандыгы үчүн Жайыл негизги мектептин мугалимдер жамааты 2 миң сом өлчөмүндө акчалай сыйлык менен сыйланышты.

«Мыкты шаардык мектеп-2022» номинациясында 1-орунду №6 орто мектеп-гимназиясы жеңип алды. Сыйлыктын суммасы 10 миң сомду түздү. Экинчи орунду №5 орто мектептин мугалимдер жамааты ээлеп, 8 миң сом алышты. Үчүнчү орун №1 башталгыч мектепке берилип, байге 5 миң сомду түздү.

Шаар мектептеринин арасында өткөн сынакка активдүү катышкандыгы үчүн «Наристе» христиандык жалпы билим берүү мектебинин мугалимдер жамааты жана Кара-Балта шаарынын балдар чыгармачылык үйүнүн мугалимдер жамааты да акчалай сыйлык менен сыйланышты.

«Нур Бешик» бала бакчасы 2022-жылдын мыкты мектепке чейинки уюму деп табылып, эмгек жамаатка 10 000 сом сыйлык берилди. Бала бакчалар арасында 2-орунду Красновосточный айыл өкмөтүнүн «Наристе» балдарга билим берүү уюмунун педагогикалык жамааты ээлешти. Аларга 8 миң сом сыйлык берилди. Ал эми 3-орун Сары-Булак айыл өкмөтүнө караштуу «Сары-Булак» мектепке чейинки мекемесине ыйгарылды.

Сынакка активдүү катышкандыгы үчүн «Ласточка» балдар билим берүү уюмунун педагогикалык жамаатына 2000 сом акчалай сыйлык берилди.