Turmush — Кара-Көл шаарында жол-транспорт кырсыгынан жаракат алган өспүрүм үйүнө чыгарылды. Бул маалыматты Turmush басылмасына Б.Рысбеков атындагы жалпы дарыгерлердин практикалоо борборунан тастыкташты.

Маалыматка караганда, айдоочу — 2006-жылы төрөлгөн С.Н. 30-август күнү үйүнө чыгып кеткен. Абалы салыштырмалуу канааттандаырарлык деп бааланууда.

Буга чейин аталган жол кырсыктан жалпы 6 өспүрүм жаракат алып, ооруканага түшүп, алардын ичинен бешөө каза болгону маалымдалган.

Жалал-Абад ОИИБдин жол кыймылынын коопсуздугун камсыздоо бөлүмүнүн маалыматы боюнча, жол кырсык Бишкек—Ош унаа жолунун 389-чакырымында 25-августта саат 03:00 чамасында болгон. Кара-Көл шаарынын 2006-жылы туулган тургуну С.Н. атасына таандык «Субару Аутбек» унаасы менен Бишкек тараптан Ошту көздөй бара жатып, жолдун бурулуш жеринен рулду башкара албай, жолдон чыгып, оодарылып кеткен.

Кырсыктын кесепетинен жалпы 5 өспүрүм каза болду. Алар: 2006-жылы туулган К.Э., 2006-жылы туулган К.Н., 2006-жылы туулган К.М., 2007-жылы туулган Ш.У. жана 2006-жылы туулган С.Б.

Кара-Көл шаардык билим берүү бөлүмүнүн маалыматы боюнча, жол кырсыкка кабылган өспүрүмдөр №2 жана №4 мектептин 9-классынын окуучулары экени такталды.

Кырсыкка кабылган балдар достор болчу.