Turmush — Чүйдүн Жайыл районунда жашы жете элек кызды зордуктоого шектелген адам Таластан кармалды. Бул тууралуу бүгүн, 9-февралда Талас ОИИБдин басма сөз кызматы кабарлады.

Маалыматка караганда, 2022-жылдын 2-декабрында Жайыл РИИБдин нөөмөт бөлүмүнө Жайыл районунун Алтын айылынын 1971-жылы туулган тургуну Т.С. кайрылган. Ал 2008-жылы туулган бир тууган жээни К.Ж.ны (кыз) өгөй атасы — Таластын Көк-Ой айылынын 1990-жылы туулган тургуну Б. уулу К. күч колдонуп, бир нече жолу зордуктаганын билдирген. Аталган факт Жайыл РИИБде катталып, караштуулугу боюнча Талас РИИБге жөнөтүлүп, тергөөгө чейинки текшерүү иши башталган. 2023-жылдын 1-январында аталган факты боюнча Кылмыш-жаза кодексинин 154-беренесинин (зордуктоо) негизинде кылмыш иш козголгон.

20-январда кылмышка шектелген Б. уулу К. кармалып, Талас райондук соту тарабынан 20-мартка чейин Талас ОИИБдин убактылуу кармоочу жайына киргизилди. Азыркы учурда тергөө амалдары жүргүзүлүүдө.