Turmush — Ош шаарынын мэриясынын бир катар токтомдорун аткарбагандыгы жана эскертүүлөрдү четтетпегендиги үчүн айрым муниципалдык кызматтардын, шаардык башкармалыктардын жетекчилерине тартиптик жаза берилди. Бул тууралуу Ош шаардык мэриясынан билдирди.

• 8-февралда 2022-жылдын жыйынтыгы чыгарылган коллегиялык жыйында айрым жетекчилерге сөгүш берүү сунушталган.

Тактап айтканда:

— Ош шаарынын мэриясынын алдындагы көп тармактуу «Үй-бүлөгө жана балдарга жардам берүү борборунун» жетекчиси Наргиза Эштаевага сөгүш жарыяланды;

— Ош шаардык муниципалдык менчик башкармалыгынын башчысы Сталбек Төрөбек уулуна каттуу сөгүш берилди;

— Керме-Тоо муниципалдык аймактык башкармалыгынын жетекчиси Жылдызбек Сактановго каттуу сөгүш жарыяланды;

— Турак жайды камсыздандыруу боюнча милдеттерин аткарбагандыгы үчүн №40 Королев, №42 Керме-Тоо, №26 Токтогул Сатылганов, №2 Карл Маркс, №4 Киров, №6 Макаренко атындагы мектептердин директорлоруна чара көрүү боюнча Ош шаардык билим берүү башкармалыгынын башчысына сунуш берилди.

— Ош шаарынын мэриясынын токтомдоруна ылайык мамлекеттик жана муниципалдык кызматтарды көрсөтүү процесстерин санариптештирүү жана автоматташтыруу боюнча иш-чаралардын аткарылбагандыгы, ошондой эле «Инфодокс» электрондук документ жүгүртүү системасына кошулбаганы үчүн Ош шаардык мамлекеттик дезинфекциялык станциясынын башкы дарыгерине карата тиешелүү чараларды көрүү жөнүндө Кыргыз Республикасынын Саламаттыкты сактоо министрлигине сунуштама жөнөтүлдү.