Turmush — Нарын шаарында тергөө кызматынын түзүлгөндүгүнүн 59 жылдыгына карата иш-чара уюштурулуп, анда өзүнүн кесибинде мыкты көрсөткүчтөрдү көрсөтө алган айрым кызматкерлер сыйланышты. Андан соң, 15 жылдан ашык тергөө кызматында иштеген Күнболот Касмалиевдин жаркын элесине карата спорттук иш-чара өткөрүлүп, ага шаар, райондук ички иштер бөлүмүнүн тергөө кызматынын кызматкерлери катышты. Бул тууралуу Нарын ОИИБдин басма сөз кызматы билдирди.

Тергөө кызматынын кызматкерлери футбол боюнча, ал эми Нарын ОИИБдин башка бөлүмдөрү волейбол оюну боюнча күч сынашты.

Оюндун жыйынтыгы менен 1-орунду Кочкор РИИБи, 2-орунду Нарын ОИИБдин борбордук аппараты жана 3-орунду Жумгал райондук ички иштер бөлүмү ээлешти.

Жеңүүчү топторго кубок, диплом, баалуу белектер жана акчалай сыйлыктар тапшырылды. Андан сырткары, мыкты оюнчуларга номинациялар ыйгарылды.

Мындай иш-чара өздүк курам арасындагы биримдикти, ынтымакты, достукту бекемдөө максатында жыл сайын уюштурулуп келет.