Turmush — Чүй облусунун Кара-Балта шаарында болгон кырсыктын чоо-жайы белгилүү болду.

Turmush басылмасынын кабарчысы билдиргендей, кырсык кечээ, 15-ноябрь күнү кечинде болгон. 20 жаштагы кыз ат үстүндө сүрөткө түшүп жатып, андан кулап, жаракат алган.

Окуя болгон жерге тез жардам кызматы чакырылган. Кыз аймактык оорукананын жандандыруу бөлүмүндө эс-учун билбей жатат. Ал медицина факультетинин 3-курсунун студенти экени да белгилүү болду.

«Бишкек шаарынан нейрохирургдарды чакырдык. Бейтаптын абалы өтө оор деп бааланууда», — дейт Жайыл аймактык ооруканасынын директорунун орун басары Азат Рустамов.

Маалым болгондой, кечинде жабырлануучу курбусу менен окуудан кайтып келе жатып, жолдон атчан жигиттерге жолугуп калышкан. Кыз ат минүүнү суранган. Алгач кыз ат үстүндө жайбаракат жүрүп, видеого түшүп жаткан. Капысынан ат катуу ылдамдыкта жүгүрүп, кыз туруштук бере албай жыгылган.

Кырсык Кара-Балта шаарынын борборунда, темир жолго жакын жерде болгон.

Окуяга күбө болгондордун айтымында, кыз катуу ылдамдыкта жолдун четине (Кара-Балта шаарынын Фрунзенская көчөсүндөгү айланма жолдо) секирип кеткен.

«Ал ат минип, жылмайып жаткан. Анан күтүлбөгөн жерден жолго кулап түштү. Унаа менен сүзүп кете жаздадым. Аны ат катуу ылдамдыкта ала качканда, анын артынан дагы бир нече атчан барды. Окуя саат 19:00дөр чамасында Кара-Балта шаарындагы темир жол өтмөгүнүн аймагында болгон», — деди окуянын күбөсү.