Turmush — Баткенде 3 гектар аянтка себилген айгүл гүлүнүн уругу чыкты. Бул тууралуу Баткен токой чарбасынын жетекчиси Бактыяр Козубаев билдирди.

Анын айтымында, былтыр Баткен токой чарбасынын кызматкерлери «Айгүл-Тоо» коругунун 3 гектар аянтына айгүл гүлдүн уругун себишкен. Учурда гүлдөр жерден башын көтөрдү. Эксперимент катары жөнөкөй короолорго да гүлдүн уругун себишкен.

«Быйыл 3 жылга гүлгө кирүүгө тыюу салынды. Бул демилгени жергиликтүүлөр жана жергиликтүү бийлик өкүлдөрү көтөрүштү. Бул гүлдү сактап калуу жана көбөйтүүгө багытталган. Ошол себептен биз да өткөн жылы гүлдүн уругун чачтык. 3 гектар аянттагы жаңыдан себилген гүл тегиз чыкты. Ошол эле айылдагы жөнөкөй жер аянтка да уругун сепкенбиз. Ал да чыкты. Качан тамыры пиязы чоңойгондо тоого көчүрүлөт. Гүл 2 жылда чыкса 7 жылда гүлдөйт. Буйруса быйылкы жылы адам изи баспай турса гүл көбөйөт деп ишенебиз», — деди ал.

Окуя тууралуу:

Буга чейин Баткен токой чарбасынан Баткендеги «Айгүл-Таш» өзгөчө корголуучу жаратылыш аймагы 3 жылга жабылганын кабарлашкан.

Маалыматка караганда, жыл сайын апрель айында ачылган айгүл гүлүнө келгендердин саны арбыйт. Бирок быйыл айгүл гүлүн сактап калуу жана көбөйтүү максатында 3 жылга корукту жабуу боюнча мораторий жарыяланды.

Сейрек кездешүүчү айгүл гүлүн сактап калуу жана көбөйтүү максатында «Айгүл-Таш» өзгөчө корголуучу жаратылыш аймагына 2023-жылдын 1-апрелинен тарта 2026-жылдын 1-апрелине чейин кирүүгө тыюу салынат.

Сүрөттөр архивден алынды