Turmush — Бүгүн, 6-майда Баткен районунун акими Учкунбек Жоробаев баш болгон делегация Төрт-Гүл айыл өкмөтүнүн Чоң-Талаа айылы менен Тажикстандын Исфара районунун Ляккон айылы чектешкен аймакта Тажикстандын Исфара районунун төрагасы Баховадин Баходурзода жетектеген делегация менен жолугушту.

Маалым болгондой, ага эки тараптын күч түзүмдөрүнүн өкүлдөрү, тийешелүү жетекчилер катышты. Анда чек ара, укуктук тартип, макулдашылбаган аймактарда курулуш иштерин жүргүзбөө, түрдүү аракеттерди болтурбоо жана алдын алуу, ирригациялык, суу, чарбалык жана күндөлүк жашоодо болуп жаткан маселелер туурасында сүйлөшүүлөр жүргүзүлдү.

Ошондой эле эки элди түрдүү провокациялык чакырыктарга алдырбоо маселелери каралып, түшүндүрүү иштерин жүргүзүү менен чек аралаш аймактарда эки тараптуу туруктуулукту сактоо жактары сүйлөшүлдү. Жолугушуу 2 саатка жакын убакытка созулуп, бир топ маселелер талкууланды. Учурда Баткен районунун чек ара аймагында коомдук-саясий абал тынч.