Turmush — Нарын облусунун Ак-Талаа районунда Чернобыль апаатынын кесепеттерин жоюуга катышкандарга акчалай жардамдар берилди. Бул тууралуу аймактык кабарчы билдирди.

Бүгүн, 27-апрелде Чернобыль апаатынын 37 жылдыгына карата район акими Жумадилла Жапаров чернобылчалар менен жолугушту.

Жолугушууда аларга калпак кийгизилип, белектер берилип, Баетов айылынан 3 адамга, Кара-Бүргөн айылынан 2 адамга, Ак-Тал айылынан 1 адамга жалпы 2 миң сомдон тапшырылды.

Чернобыль апаатынын кесепеттерин жоюуга Ак-Талаа районунан жалпы 8 адам катышып, алардын арасынан 2 адам каза болгон.

1986-жылы 26-апрелде Украинадагы Припять шаарына жакын жайгашкан АЭСтин 4-энергия блогунда техникалык авария болгон. Масштабы боюнча ядролук энергетика жаатында эң ири авария болуп саналат. Андан айлана-чөйрөгө радиоактивдүү заттар (уран, плутоний, Йод-131, Цезий-134, стронций-90 жана башка изотоптор) тараган. Радиоактивдүү заттардын бөлүнүшү 1986-жылдын май айында миңдеген ликвидаторлордун (чернобылчылардын) зор эмгеги менен гана токтотулган.