Turmush — Жумгал районунун борбору Чаек айылында мамлекеттик туу жана ак калпак күнүнө карата бүгүн, 3-мартта жөө жүрүш өттү. Бул тууралуу аймактык кабарчы билдирди.

Жөө жүрүшкө мекеме кызматкерлери, мектеп окуучулары катышып, 2 чакырым жерден калпак кийип, туу көтөрүп, район борборуна басып келишти.

Ал эми Чаек айылындагы Арманбек Өмүралиев атындагы №24 кесиптик окуу жайынын студенттери ири көлөмдө жасалган калпакты борбордук аянтка алып чыгышса, Отунчу Ногойбаев атындагы орто мектебинин окуучулары көлөмү чоң тууну көтөрүп басышты.

Иш-чарада улуттук баш кийим болгон ак калпактын мааниси жана баалуулугу сөз болуп даңазаланып, мектеп окуучулары тарабынан даярдалган патриоттук ырлар тартууланды. Майрамдык салтанаттын соңунда маданият кызматкерлери концерттик программа тартуулады.