Turmush — Кечээ, 17-октябрда Жалал-Абад шаардык кеңешинин 18-сессиясы өттү. Депутаттар Кадыржан Батыровдун мамлекетке өткөн объектилеринин катарына кирген көп кабаттуу үйдөгү 7 батирди тилкелей сатууга макулдук бергенин Turmush басылмасынын кабарчысы билдирди.

• Сөз Жалал-Абад шаарынын З.Жамашев көчөсүнүн №135 дарегинде жайгашкан көп кабаттуу үйлөрдөгү 7 батир тууралуу болуп жатат.

——————————————————-

2023-жылдын март айында Жалал-Абад шаардык кеңешинин депутаттары 18 батирди сатууга макулдук берген.

——————————————————-

Сессияда маалым болгондой, эми шаар мэриясы муниципалдык батирлерде 2006-жылдан бери жашап келген жашоочулар менен келишим түзүп, жашоочулар 10 жылдык мөөнөткө чейин белгиленген төлөмдөрдү төлөп бериши керек.

Сөз болуп жаткан З.Жамашев көчөсүндөгү көп кабаттуу үй көз карандысыз баалоочулар тарабынан бааланган. Ал жердеги жашоочулар терезе орнотуп, суу тартып киргени, тепкичтерди куруп бүтүргөнү сыяктуу жумуштарды аткарганы эске алынып, 50 пайыздык кыскартуу болгон. Батирлер кабатына жана бурчта жайгашкандыгына карап эң арзаны 680 миң сомго, эң кымбаты 717 миң сомго чейин бааланды. Баары 3 бөлмөдөн турат. 20дан ашык үй-бүлө баалоого, мэрия менен келишим түзүп төлөөгө макул болгон. Сатып алууну каалабаган жашоочулар жашай берет, бирок үйлөр муниципалдык үй бойдон калат.

Сөз болуп жаткан көп кабаттуу үй 52 батирден турат. Анын ичинен 22 батир сот тарабынан конфискацияланганга чейин документтештирилген. Үйгө 2006-жылы К.Батыровго нааразы болгондор эч кандай документсиз кирип алышкан. 2010-жылы Батыровдун мүлктөрүнүн катарында мамлекетке өтүп, «Элдик» мамлекеттик ишканасына берилген. 2016-жылы Жалал-Абад шаардык мэриясынын алдындагы муниципалдык менчикке өткөн. Ал эми жашоочулар 2006-жылы шаар мэри болуп турган Дүйшөнали Мамасалиевдин уруксаты менен киргенин айтып келишет. Бирок бир дагы тиешелүү документ көрсөтө алышкан эмес.

Аталган үй калаадагы кирпич заводдо иштеген кызматкерлер үчүн 1985-жылы курулуп баштаган. Көп кабаттуу үйдүн чатыры жабылып калганда союз тарап, кыш завод Батыровго сатылып кеткен. Завод жетекчилиги менен Батыров ортосунда түзүлгөн келишимге ылайык үйлөр заводдо иштеп, үй алуу үчүн кезекте тургандарга берүү да каралган.

Жолдошу 25 жыл, өзү 20 жыл кыш заводдо иштеп жүрүп К.Батыров менен 8 жыл соттошуп жатып, араң үйгө жеткен Буажар Энназарова үй алуу оңой болбогонун айтып берген.

«Кыш заводдо ишемби, жекшемби күндөрү үй алабыз деп акысыз иштечү элек. Бул үй ошол кирпич заводдун балансында болчу, үй бүткүчө эле союз тарап, завод сатылып кетти. Үй алуу үчүн кезекте турган 10 үй-бүлөгө ушул үйдөн бере турган болуп, завод жетекчилиги менен К.Батыровдун ортосунда келишим түзүлгөн. К.Батыров сөзүнө турбай, үйдү бербөөнүн аракетин көрүп, ал менен 8 жыл соттоштук. Соттордун адилеттик чечими менен үйдү өткөрүп алдык. Биз башка жактан үй чыкса да ушул үйдөн алабыз деп күтүп жүрдүк. Завод сатылбаганда, үй алам деп иштеген далай кызматкерлер ушул үйгө ээ болушмак, айрымдары иштеп-иштеп кала беришти», — деген ал.

————————————————-

Кадыржан Батыров 1956—жылы 9—мартта Жалал—Абадда туулган. Ал Кыргызстандагы өзбек коомунун лидери болгон.

К.Батыровго өлкөнүн түштүгүндө массалык баш аламандык уюштуруу боюнча айып тагылып, Кыргызстандан чыгып кеткен. Кыргызстандын Башкы прокуратурасы ага эл аралык издөө жарыялаган болчу. Ал эми 2012-жылы сот аны өмүр бою эркинен ажыраткан. 2011-жылы соттун чечими менен мүлкү конфискацияланган.

Ал Швецияда сасий башпаанек алган.

Кыргызстандын парламентинин мурунку депутаты Кадыржан Батыров 2018—жылы 4-декабрга караган түнү 62 жашында Украинанын Одесса облусунда көз жумган.

Жалпыга маалымдоо каражаттарынын маалыматы боюнча, ал намаз окугандан кийин уктап, бирок кайра ойгонгон эмес. Ал Ташкенттеги көрүстөндө жерге берилген.