Turmush — Жалал-Абад облусунун Токтогул районунда баӊгизат сатууга шектүү жаран кармалды. Бул тууралуу облустук милициянын басма сөз кызматы билдирди.

Маалыматка караганда, Жалал-Абад ОИИБдин баӊгизаттарын мыйзамсыз жүргүртүүгө каршы күрөшүү бөлүмчөсү тарабынан облус аймагында М. каймана аттуу жаран баӊгизат сатып жана сактап жүргөндүгү боюнча ыкчам маалыматтарды алган.

Бул факты Жалал-Абад ОИИБдин Кылмыштардын бирдиктүү реестрине Кылмыш-жаза кодексинин 282-беренеси (баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) менен катталып, кылмыш иши козголгон.

2023-жылдын 17-мартында саат 23:40 чамасында Жалал-Абад ОИИБдин баӊгизаттарын мыйзамсыз жүргүртүүгө каршы күрөшүү бөлүмчөсүнүн кызматкерлери тарабынан Токтогул районунун аймагынан Токтогул районунун 1972-жылы туулган тургуну А.У.дан 10 даана ширеӊке кутучасынын формасындагы кара-күрөӊ түстөгү өзгөчө кескин жыты бар зат, 1 литрлик банкага салынган марихуана баӊгизатына окшогон затты сатып жаткан жеринен кармалган. Ошондой эле өз ыктыяры менен өзү жашаган үйдөн 1 капка салынган марихуана баӊгизатына окшогон затты тапшырган.

Жалал-Абад ОИИБдин криминалистикалык кызматынын корутундусуна ылайык, кара-күрөӊ түстөгү өзгөчө кескин жыты бар зат 74 грамм гашиш баӊгизаты, 1 литрлик банкага салынган зат 178 грамм марихуана баӊгизаты жана 1 капка салынган зат 7 килограмм марихуан баӊгизаты экендиги аныкталган.

Шектүү Жалал-Абад ОИИБдин тергөө кызматы тарабынан убактылуу кармоочу жайга киргизилди. Учурда тергөө амалдары уланууда.